ئەڤینا دەمەكێ دمتیژ
رۆژا مزووری
روحەك
دکاڤلەکێ تژی ژیان دا مر!
وئەز نزانم
كاڤل گۆڕبوو یان ژیان شۆڕ بوو
یان ژی مرن سختەچی بوو…
دەنگەكێ دگۆت درەنگە
دو چاڤێن نقاندی
نە گری راوەستیا و نە رۆناهیێ
دلێ دیتنێ برە دیمەنان
هەمی تشت دبوو زێمارەكا ب كەزی…
هزار “ئەزا” تێرا هەمبێزا وێ روحێ نەدكر…
نالینان ب تلیلی ڤە دربێن نازك
دادوەشاندن نیڤ گڕنژینەكا خۆڤەدزی
دەستێ خۆ دانا سەر دلێ خۆ و گۆت
ئەی دەهۆل.. بەلایا سەرێ هزرێ..
داوەتی ژی حەزێن ب ناكۆكینە..
خۆ ل سەر سێلا قەدەغە دهێلن
خەونا ب شەواتا خۆناڤێ دشۆن..
خۆناڤ ژی نازكە و مریتۆیە..
و بێهنا دویكێلا بیرئانینا چپك چپك
دكرە گولاڤ و ل بەژنا سەرمایا خۆ دا دكر..
دەڤ دبوو تاڤی
رویێ بایی شل دكر
و ژۆردا بیبیكا بیناهییا رۆناهییێ تیژدكر
ئەو روحە سیتاڤە
ب حەزە ب هەستە
هەبوونە بێ بەرجەستە
لێ جاران ژی دبوو لەش
و بەس من ددیت..
ژبەر بنئاخکرنا لەشەکێ پیرۆز
خۆ کربوو هێلینا خەمەکا ئەزەلی
دەرگەهێ دلسۆزیێ دگرت
و ئارامی لبن پێلێن دەستهەلاتەکا دژوار
دبوو پشیكەكا كەهی
هشکبوونا خوینێ د دەمارێن دلی دا
لەشێ بێ چارە دکوشت
گەهشتن ب حەزەکا بۆرییا ئازریایی
دادگەهـ ب دوماهیکا خۆ دکر
ل جهەکێ دویر، دوبارە
ل دلخۆشییێ دگەڕیا
دزینا دلدارێ وێ دچاڤێن وێ دا
دەردەکێ کوژەک دسینگی دا ڤەدکر.
بۆ دۆزەخەکا نوی؛ پێنگاڤێن خۆ
ب ئاخێ ڤە دهێلان!
پاشی وێرەك دبوو و حەز ژ فڕینێ كر
چاڤێن خۆ ب سیمایێ سەمایێ ڤە دشێلان
دەستیێن خۆ دكرن شالۆك..
دلپاکییا خۆ گۆری هەڤدژیێ دکر.
تیشکێن ڕۆژێ بوونە وەریسێن ڕزگاربوونێ
بوهار بۆ دلداران دکرە سەرهلدان
دبوو دارا ئادارێ و
نەورۆزێن تەمەنی پێڤە دبوون میمۆك..
سەربۆرا خۆ دکرە دیرۆکەکا نەمر
دیمەنێن دلتەزین دگەل گەزییا دڤەهاندن و
لبن گرێکێن كەزییان خۆ
دڤەشارتن.
