دڤێت ئێرشێن ل سەر تاخێن کوردان بهێنە راگرتن
جڤاتا سووریا دیموکرات دیار دکەت، د دەمەکێ دا کو کار بۆ چارەسەرکرنا گەلەک پرسێن ل سووریێ دهێتە کرن، چەکدارێن سەر ب حوکمەتا سووریێ ئێرشی هەر دو تاخێن کوردان ل حەلەبێ دکەن و ئەو یەک دێ سووریێ تووشی قەیرانەکا دی یا مەزن کەت.
جڤاتا سووریا دیموکرات د داخویانیەکێ دا دیار دکەت، د دەمەکێ دا کو هەسەدە و شام دانوستاندنان دکەن دا پرسێن هەی چارەسەر بکەن، مخابن چەکدارێن سەر ب حوکمەتا بەروەخت یا سووریێ ب چەکێ گران ئێرشی تاخێ کوردان ل حەلەبێ دکەن و ژ بەر ئێرشێن گرۆپێن چەکدار مخابن هەتا نها ٤ وەلاتیێن سڤیل شەهید کەفتینە و ٢٥ کەس ژی بریندارن و پڕانیا قوربانیان ژی ژن و زارۆنە و ئەو یەک زۆرداریەکا گەلەک مەزنە کو ل گەلێ کورد دهێتە کرن و دڤێت گرۆپێن چەکدار ئێرشێن خوە بدەنە راگرتن و دڤێت شام ژی نەهێلیت گرۆپێن چەکدار ب چەکێ گران ئێرشی وەلاتیێن سڤیل یێن کورد ل حەلەبێ بکەن.
جڤاتا سووریا دیموکرات ئەو یەک ژی دیار کریە، دڤێت ئەمریکا و وەلاتێن دی رێ نەدەن وەلاتیێن سڤیل یێن کورد ببنە قوربانی و دڤێت رێگری ل چەکدارێن سەر ب ئەحمەد شەرعی بهێتە کرن، مخابن یا نها روو ددەت دێ سووریێ تووشی شەڕەکێ ناڤخوەیی کەت، چونکی کوردان دڤێت د سووریایەکا نوو دا ل گەل هەموو پێکهاتەیێن دی وەکو برا بژین، لێ ئێرشێن بەردەوام یێن گرۆپێن چەکدار ل سەر هەر دو تاخێن کوردان ل حەلەبێ دێ بیتە ئەگەرێ ئالۆزیێن گەلەک مەزن و بێگومان کورد ل سووریێ زۆرداریەکا وەسا قەبوول ناکەن و دڤێت ئێدی دووماهی ب ئێرش و دۆرپێچێن ل سەر هەر دو تاخێن کوردان ل حەلەبێ بهێت و گرنگە ئەمریکا، وەلاتێن ئێکەتیا ئورۆپا و نەتەوەیێن ئێکگرتی ژی ب رۆلێ خوە رابن و نەهێلن سووریێ ببیتە مەیدانا شەڕەکێ نوو.
ل ئالیێ دی هژمارەک زێدە ژ رەوشەنبیر و نڤیسەرێن تورکیا ژی دوهی د نامەیەکێ دا داخواز ژ سەرۆک کۆمارێ تورکیا کرن کو سیاسەتا خوە ل هەمبەر سووریێ بگوهۆڕیت و دڤێت تورکیا دەست ژ دوژمناتیا کوردان بەردەت، چونکی هەر کەس دزانیت چەکدارێن سەر ب ئەحمەد شەرعی ب پشتەڤانیا تورکیا و ل سەر داخوازا ئەنقەرە ئێرشی کوردان دکەن، هەکە ئێرشێن وەسا بەردەوام بن دێ ئەو یەک بیتە ئەگەرێ ژناڤچوونا قووناغا ئاشتیێ و گرنگە تورکیا رۆلەک ئەرێنی بگێریت، تورکیا دشێت رۆلەک گرنگ ژ بۆ چارەسەریێ ل سووریێ بگێریت، مخابن رۆلێ نها یێ تورکیا ل سووریێ گەلەک خرابە و ئەو یەک دێ بیتە ئەگەر کوردێن سووریێ پتر خوە ژ تورکیا دوور بکەن و ئەو یەک د بەرژەوەندیا تورکیا دا نینە.
