د سەقایەكێ بارانی دا و گەرماتییا پشتەڤانان سەركەڤتن و وەكهەڤی ئەنجامێن گەڕا 11ێ بوون
قەیس وەیس:
ب دو سەركەڤتن و دو وەكهەڤی هەر چار یانەیێن كوردستانی یاریێن گەڕا 11 ژ خولا ستێرێن ئیراقێ یا فوتبۆلێ ب دووماهی ئینان ئەوێن دناڤبەرا ئاست و ئەنجامێن باش و یێن خراب دا، یانەیا هەولێر هەتا نوكە سەركێشا خولێ یە و دهۆك پێشڤەهات و زاخۆ دو خال ژ دەستدان.
دهۆك بەردەوامە یۆ دەستڤەئینانا خالان
تیما یانەیا دهۆك ئەلهۆیێن چیا سەركەڤتنەكا گرنگن و پێشڤەچوونەكا باش د خولا ستێرێن ئیراقێ دا ب دەستڤە ئینا پشتی د یارییا خوە یا ئەینییا بۆری ب سەركەڤتنی ل سەر یانەیا مینا یا بەسرایی ب گۆلەكێ بێ بەرانبەر د یارییا واندا ئەوا د سەقایەكێ بارانی و سار دا لێ ب گەرماتییا پشتەڤانێن دهۆكێ د ناڤا یاریگەهێ دا، گۆلا دهۆكێ ژلایێ پێشەكارێ وێ یێ بەرازیلی بۆلیۆ جۆنیۆر سامبۆ د خولەكا 15ێ دا تۆماركر.
ئەڤ سەركەڤتنە بوو ڕێكخوشكەر تیما دهۆكێ ب سەرپەرشییا ڕاهێنەر عەبدەولغەنی شەهد پێشڤە بچیت د ڕێزبەندییا خولێ دا ژ ڕێزا 14ێ بۆ ڕێزا حەفتێ بهێت ب 17 خالان ژ پێنچ سەركەڤتنان، دو وەكهەڤی و سێ خوسارەتی هەنە، ژوان یارییان ل سەر دەمێ عەبدولغەنی پێنچ سەركەڤتن و دو وەكهەڤی هاتینە، یارییا بهێت یا گەڕا 12ێ دێ دێربییەكێ ئاگرین بیت ل رۆژا سێشەمبییا بهێت دەمێ دبیتە مێڤانا یانەیا هەولێر ل یاریگەها شەهید فرانسۆ حەریری.
زاخۆ ب نەهـ یاریزانان دو خال ژ دەستدان
تیما یانەیا زاخۆ بەردەوامی دا ئەنجامێن خوە یێن لاواز تایبەت د ناڤ ئەرد و جەماوەرێ خوە دا پشتی دگەل مێڤانا خوە یانەیا ئەمانەت بەغدا ب دو گۆلان وەكهەڤ بووی، د یارییا واندا ئەوا ل ئەینییا بۆری ل یاریگەها یانەیا زاخۆ هاتییە كرن، هەردو گۆلێن زاخۆ ژلایێ پیشەكارێ وێ دیبۆتی و كاپتنێ تیمێ ئەمجەد عتوان ب لێدانا پەنەلتیێ د خولەكا 90+4 دا ئینا، د ڤێ یاریێ دا دادڤانێ یاریێ ل خولەكا 55ێ یاریزانێ زاخۆ مەهدی كامل ب كارتا سۆر دوورئێخست.
بڤێ ئەنجامی تیما یانەیا زاخۆ ڕێزبەندییا خوە یا 10ێ پاراست و نەشیا دلی جەماوەرێ خوە خۆشبكەت و خالێن خوە ب گەهینە 16 خالان ژ چار سەركەڤتن، چار وەكهەڤی و سێ خوسارەتی هەنە، یارییا بهێت یا كوڕێن خابۆری دێ ل چارشەمبییا بهێت ل پایتەختێ ئیراقێ بەغدا بیتە مێڤانا یانەیا كارەبا د یارییەكا گرنگ دا.
داخویانیێن ڕاهێنەران
هاریكارێ ڕاهێنەرێ دهۆكێ ژ ئاستێ یاریزانان ڕازییە
د داخویانیا خوە دا حەیدەر نەجم هاریكارێ ڕاهێنەرێ یانەیا دهۆك گۆت: ئەز پیرۆزباهیێ ل هەموو یاریزانان، كادرێ ڕاهێنانێ، كارگێری و پشتەڤانێن یانەیێ دكەم ئەو ئارمانجا ئەم ل سەر دچین یا بەرهەمدارە و سەركەڤتنێن مە ب هەڤگرتنا كۆمە كو شەڤ و رۆژ كار دكەین بۆ سەركەڤتنا و هەڤڕكیێ بۆر ِێزێن پێشیێ بكەین، هەرچەندە یارییەكا ب زەحمەت بوو و دكاودانەكێ تایبەت دا بوو كو ژبەر سەقایێ بارانی و سار لێ جەماوەرێ یانەیێ هەر ژ دەستپێكا یاریێ هەتا دووماهیێ پشتەڤانی دكر، ئەم دەستخوەشیێ لێ دكەین ئەون هێزا تیمێ.
هەروەسان گۆت: مە سێ خالێن گرنگ ب دەستڤە ئینان ئەو یا باش بوو، ئەو ڕێزبەندیا نوكە ژی ئەم تێدا نە ل دووڤ ئارمانج و هیخوازییا مەیە دێ هەموو بزاڤا كەین پێنگاڤێن پێشڤەچوونێ بەردەوامبن، ئەڤ یارییە بۆ مە بۆ ڕابردوو و دێ پلانا بۆ یارییا بهێت دانین.
وێسام ڕزق: بێ چەنسین
ژلایێ خوەڤە یێ قەتەری ویسان ڕزق ڕاهێنەرێ یانەیا زاخۆ گۆت: یارییەكا ب هێز و ب زەحمەت بوو بەرانبەر ئەمانەت بەغدا، نیڤا ئێكێ ئەم گەلەك باش بووین و پێشكەڤتی بووین، لێ دوورئێخستنا یاریزانێ مە د دەستپێكا نیڤا دویێ دا كارتیكرنا نەرێنی ل سەر ئاست و پلانێن مە كر، سەرباری ڤێ ژی ئەز ژ ئاستێ تیما خوە ڕازی نینم لێ ب گڤاشتن دیاریێ دا و پشتەڤانییا بەردەوام یا جەماوەری وەكر ئەم ل خولەكێن دووماهیێ یێن یاریێ ڤەگەرین و گۆلا وەكهەڤیێ ب نەهـ یاریزانان بینن، هەرچەوابیت ئەڤە نە ئەو كەساتییا تیمێ یە یا مە بڤێت و ئەم هەموو بەرپرسین ژ تیمێ دوورئێخستنا یاریزانان د هەر یارییەكێ دا كارتیكرن ل سەر تیمێ كرییە و دڤێت بۆ یارییا بهێت قەربوو بكەین.
هەروەسان ناڤهاتی گۆت ژی: ئەم تیمەكین ب قەوارییەكێ بهێز پێكڤە كار دكەین و پێكڤە پلانان ب سەركەڤتنان دانین و پێكڤە ل چارەسەرییا دگەریین، پێكهاتیێ تیما مە كێم یاریزانن بەرانبەر پشكدارییا مە د خولا ستێرێن ئیراقێ و كۆپا كەنداڤی دا، لێ ئەڤ بابەتە دێ چارەسەر بیت، بۆ یاریێن بهێت مە شیانێن قەرەبوویا خالان هەیە، سەرباری گڤاشتنا خولێ ب هەبوونا یارییان هەر چار رۆژان جارەكێ كارتیكرنا خوە یا نەرێنی هەیە.
هەولێر پێشەنگا یانەیێن ئیراقێ یە
تیما یانەیا هەولێر بەردەوامی دا پێشەنگییا خوە د خولێ دا و شیا سەركەڤتنا هەشتێ بینت، پشتی ب دو گۆلێن پاقژ سەركەڤت ل سەر یانەیا مووسل ئەوا ل یاریگەها یانەیا دهۆكێ هاتییە كرن، كوڕێن كەلهە و منارە ئەوێن بۆ ماوەیێ شەش حەفتییە سەرێ لیستێ بەر نەدایە و شیا خالێن خوە ب گەهینە 27 خالان ب سەركێشیا ڕاهێنەر باسم قاسم ژ هەشت سەركەڤتنات و سێ وەكهەڤی و هیچ خوسارەتیەك نە دایە، هێرشبەرێ وێ یێ كازاخستانی شێرزۆ تیمیرۆڤ ب 11 گۆلان سەرێ لیستا گۆلكەران دهێت.
یاریێن گەڕا 12ێ دێ بڤی شێوەیی بن.
ل رۆژا سێشەمبی،
هەولێر- دهۆك، ل دەمژمێر 5:30 مەغرەب.
دیالا- زەورا، ل دەمژمێر سێیێ ئێڤاری.
شورتە- مووسل، ل دەمژمێر سێیێ ئێڤاری.
ئەمانەت بەغدا- جەوییە، ل دەمژمێر 5:30 مەغرەب.
ئەلگەرمە- ئەلقاسم، ل دەمژمێر 5:30 مەغرەب.
یاریێن رۆژا چارشەمبیێ.
كارەبا- زاخۆ، ل دەمژمێر سێیێ ئێڤاری.
نەورۆز- تەلەبە، دەمژمێر سێیێ ئێڤاری.
ئەلعراف- نەفت، ل دەمژمێر سێیێ ئێڤاری.
نەجەف- نەفت میسان، ل دەمژمێر 5:30 مەغرەب.
ئەمانەت بەغدا- كەرخ، ل دەمژمێر 5:30 مەغرەب.
