ب شێوەی مرۆڤن
عاصمە فخری
د سەردەمێ نوكە دا ژبەر بەلاڤبوون و زۆر بكارئینانا سۆشیال مەدیایێ، هندەك كەس ژ ژییێن جۆدا پڕانییا دەمێ خوە ل سەر سۆشیالێ و ب بەرێخۆدانا ڤیدیۆیێن كورت دبۆرینن ئەو دەمێ مایی ژی بۆ خوارن و ڤەخوارن و نڤستنێ دمینیت. پرسیارا بەردەوام مەژیێ من مژویل دكەت چەوا ئەڤ كەسە دشێن بێ هەبوونا هیڤیان و ئارمانجان بژین!؟ چەوا دشێن بێ هزركرن بژین!؟ ئەرێ مانە بتنێ هزركرنە مە مرۆڤان و گیانەوەران ژ ئێك جودا دكەت؟ هەكە بتنێ ئەز بخۆم و ڤەخۆم و بنڤم و دەمێ خوە ب هەروەیی ببۆرینم ل ڤێرێ چو تشت نینن جوداهییا من دگەل گیانەوەران بكەت، تشتێ سەرەكی مە مرۆڤان ژ گیانەوەران جودا دكەت هزركرنە، ئەم دشێن هزربكەین و ل دووف ئەوێ هزركرنێ كاربكەین و بڕیارێن ژیانا خۆ یا نوكە و پاشەرۆژێ بدەین.
هەر مرۆڤەكێ خودێ ئافراندی ژ بۆ مەرەمەكێ و بجهئینانا ئەركەكی یە و چو كەس ژ ڤالاهییێ نەهاتینە هەبوونێ، ل سەر تاكی دمینیت ل دووف بگەڕیێت و ببینت و كار بۆ گەهشتنا وێ بكەت، د جیهانێ هەموویێ دا پەنجەمۆرا دو كەسان وەكی یا ئێك نینە، هەر ئێكی شێوازەكێ پەنجەمۆرێ یێ تایبەت ب خوەڤە هەیە، ڤێجا بۆچی پشتی دمرین دێ ناڤێن مە وەكو كەلەخێن مە بن ئاخ و بەرزەبن؟ یان ژی بۆچی دێ بییە كۆپییا كەسەكێ دی؟ د جیهانێ دا هەكە دو كەس وەكهەڤبن ڕامان ژێ ئەوە ئێك ژ وان هەبوونا وی زێدەیە د ژیانێ دا، بژی وەكو خوە هەر ژ ئێك ژ مە ل جهێ خوە وەكو خوە یێ جوانە.
بۆچی ئەز ژی ئێك ژ مرۆڤێن داهێنەر نەبم؟ ئەڤجا ل ڤێرێ هەر ئێك ل دووف بیاڤ و شاڕەزاییا خوە كارەكی بكەت مفا پێ بگەهیتە هەموو مرۆڤایەتی، هەتا پشتی مرنا وی ژی ناڤ و داهێنانا وی زیندی بمینیت هندی مرۆڤایەتی هەیی ناڤێ وی/ێ دگەل داهێنانا وی/ێ زیندی بمینن د بیردانك و دناڤ بەرپەڕێن دیرۆكێ دا، و ب درێژاهییا هەبوونا مرۆڤ و مرۆڤایەتییێ مفایی ژێ وەربگرن.
