چەکدارێن داعشێ د ئێرشا ل سەر هەر دو تاخێن کوردان دا پشکدار بوون
رێڤەبەریا خوەسەر دیار دکەت د ئێرشا ل سەر هەر دو تاخێن کوردان دا چەکدارێن داعشێ ژی پشکدار بوون و وان تاوانێن مەزن دەرحق خەلکێ سڤیل ئەنجام داینە و دڤێت جڤاکێ نێڤدەولەتی ل هەمبەر روودانێن ل حەلەبێ بێدەنگ نەمینیت.
رێڤەبەریا خوەسەر د داخویانیەکێ دا دیار کر، ب پشتەڤانی و پشکداریا تورکیا هزاران چەکدارێن توندرەو ب هەموو چەکێن گران ئێرشی دو تاخێن کوردان ل حەلەبێ کرن و تنێ هێزێن ئاسایشێ ل وێرێ هەبوون و ب چەکێ سڤک بەرسڤا ئێرشان دان و هەروەسا د ئێرشا ل سەر هەر دو تاخێن کوردان دا چەکدارێن داعشێ ژی پشکدار بوون و گەلەک بەلگەیێن ل بەر دەست نیشا ددەن، کو چەکدارێن تیرۆرست ئێرشی خەلکێ سڤیل کرینە، ژ بەر ڤێ یەکێ ژی دڤێت هەڤپەیمانیا نێڤدەولەتی یا شەڕێ ل دژی داعشێ، ئەمریکا، ئێکەتیا ئۆرۆپا و نەتەوەیێن ئێکگرتی ل هەمبەر تاوانێن کو ل هەر دو تاخێن حەلەبێ دەرحەق گەلێ کورد هاتنە کرن، بێدەنگ نەمینن و ژبیر نەکەن کا گەلێ کورد د شەڕێ ل دژی داعشێ دا چاوا بەرگری ل مرۆڤایەتیێ کر.
رێڤەبەریا خوەسەر ئەو یەک ژی دیار کریە، ب ناڤبژیڤانیا هێزێن نێڤدەولەتی ئاگربەست ل حەلەبێ هاتە راگەهاندن و شەرڤان و بریندار بۆ دەڤەرێن ل ژێر دەستهەلاتا هەسەدێ هاتینە ڤەگۆهاستن، لێ دڤێت هێزێن ناڤبژیڤان سۆزێن خوە بجه بینن و رێ نەدەن چەکدارێن توندرەو مافێن مرۆڤی بنپێ بکەن و خەلکێ سڤیل بکوژن، دڤێت خەلکێ مە بهێتە پاراستن.
رێڤەبەریا خوەسەر داخواز ژ خەلکێ کورد یێ هەر دو تاخێن کوردی ل حەلەبێ ژی دکەت کو ل مالێن خوە بمینن و یێن کۆچبەر بووینە ژی ڤەگەرنە ڤە مالێن خوە، چونکی پیلانەکا مەترسیدار یا تورکیا و شامێ ژ بۆ گوهۆڕینا دیموگرافیا دەڤەرێن کوردی هەیە و دڤێت رێگری ل پیلانا وان یا مەترسیدار بهێتە کرن.
ل ئالیێ دی مەزلوم عەبدی فەرماندارێ گشتی یێ هەسەدێ ژی دیار کر، وان بزاڤ دکرن هەموو پرسێن هەی ل گەل شامێ ب رێیا دانوستاندنان چارەسەر بکەن، لێ شامێ بریارا شەڕی دا و ئێرشی هەر دو تاخێن کوردان هاتنە کرن، ئاسایشا ل هەر دو تاخان بەرخوەدانەک مەزن کرن و شیان رێگریێ ل چەکدارێن توندرەو بکەن، د دووماهیێ دا ب ناڤبژیڤانیا هێزێن نێڤدەولەتی ئاگربەست هاتە راگەهاندن، مخابن چەکدارێن توندرەو گەلەک قانوونێن نێڤدەولەتی و بهایێن مرۆڤایەتیێ بنپێکرن، یا ل دژی خەلکی سڤیل هاتە کرن تاوانەک مەزن بوو، دڤێت ئەمریکا و ئێکەتیا ئورۆپا و وەلاتێن دی ل هەمبەر کومکوژیا ل حەلەبێ بێدەنگ نەمینن، ئەم دێ خەلکێ خوە پارێزین و یا ل حەلەبێ هاتە کرن ژی نیشا دا یێن سووریێ برێڤە دبەن کەسێن مەترسیدارن.
