نێزیكی حەفت مێگاواتێن كارەبێ ژ تێهنا رۆژێ ل دهۆكێ بەرهەم دهێن
دهۆك، دلۆڤان ئاكرەیی:
جێگرێ رێڤەبەرێ گشتی یێ كارەبا پارێزگەها دهۆكێ دیاركر، ل سنۆرێ پارێزگەها دهۆكێ زێدەتر ژ 530 پشكدارێن كارەبێ سیستەمێ سۆلار بۆ خۆ دامەزراندینە، كو ئەو سیستەمێن هاتینە دانان، نێزیكی 6.8 مێگاواتێن كارەبێ بەرهەم دئینن و ب گشتی ل پارێزگەهێ نێزیكی حەفت مێگاواتێن كارەبێ ژ تێهنا رۆژێ بەرهەم دهێن.
حازم مەحەمەد، جێگرێ رێڤەبەرێ گشتی یێ كارەبا دهۆكێ بۆ رۆژنامەیا ئەڤرۆ گۆت: «ئەگەر ئەڤ حەفت مێگاواتێن كارەبێ ب رێیا دیزل یان گازێ هاتبا بەرهەمئینان، سالانە دبوو ئەگەرێ دەركەڤتنا نێزیكی پێنج هزار تەنێن گازا دووەم ئۆكسیدێ كاربۆنێ، لەورا ئەڤ سیستەمە فاكتەرەكێ گرنگە بۆ پاراستنا ژینگەهێ».
