هزار مێگاواتێن كارەبێ زێدەبووینە
هەولێر، قائید میرۆ:
رێڤەبەرێ گشتیێ بەرهەمئینانا كارەبێ دیاركر، هزار مێگاواتێن كارەبێ ل سەرانسەری هەرێما كوردستانێ زێدەبووینە و دبێژیت: چار یەكەیێن دهۆكێ نوكە ب غازێ كەفتینە كاری بۆ زێدەكرنا بەرهەمێ كارەبا نیشتیمانی.
فارس میرخان، رێڤەبەرێ بەرهەمئینانا كارەبێ بۆ رۆژناما ئەڤرۆ خویاكر، هزار مێگاواتێن كارەبێ هاتینە زێدەكرن، ئەو ژی ب رێیا زێدەكرنا بەرهەمێ غازێ ل وەستگەهێن خۆرمەلە ل هەولێرێ و وەستگەهێن دهۆكێ و گۆت: «د دەمێ نوكە دا چار یەكەیێن دهۆكێ ب غازێ كار دكەن ل گەل دو یەكەیێن هەولێرێ، ئەڤە ژی بووینە ئەگەرێ بلندبوونا رێژەیا بەرهەمئینانا كارەبێ و گەهشتیە چار هزار و 800 مێگاواتان».
فارس گۆت ژی: «بزاڤێن حوكمەتا هەرێما كوردستانێ د بەردەوامن بۆ زێدەكرنا بەرهەمێ كارەبێ، چونكی بەردەوام خواست ل سەر كارەبێ زێدەدبیت و رێژەیا ئاكنجی و جهێن بازرگانی بەر ب زێدەبوونێ نە، هەرێما كوردستانێ پێدڤی ب شەش هزار مێگاواتێن كارەبێ هەیە و بزاڤێن مە ئەون بەرهەمئینانا كارەبێ بگەهینە شەش هزار مێگاواتان».
