39 سالیا مالئاڤاییا ئدریس بارزانی هاتـە ساخـكرن
رەمەزان زەكەریا:
ب پشكداریا بەرپرسێن بلند و جەماوەرەكێ زۆر د مەراسمەكا شایستە دا، ل رۆژا 2026/1/29، بیرەوەریا 39 سالیا مالئاڤاییا سەركردێ نەمر ئدریس بارزانی، كو ب ئەندازیارێ ئاشتی و تەباییێ دهێتە نیاسین، ل باژێرێ هەولێرێ بلند هاتە راگرتن.
رێورەسم ژ لایێ دەزگەهێ نێڤدەولەتی یێ پێشمەرگەی بۆ كارێن مرۆڤایەتی هاتبوو رێكخستن، ب ئامادەبوونا هەژمارەكا ئەندامێن مەكتەبا سیاسی یا پارتی د، سیاسەتمەدار، فەرماندەیێن سەربازی، پێشمەرگەیێن دێرین و جەماوەرەكێ بەرچاڤ هاتە برێڤەبرن.
د رێورەسمان دا وەستگەهێن ژیان و خەباتا كاك ئیدریس بارزانی وەكو سەركردەیەكێ كاریگەر و ژێهاتی د سەدێ بیستێ دا هاتنە بەحسكرن.
كاك ئیدریس بارزانی د دیرۆكا بزاڤا رزگاریخوازیا كوردستانێ دا وەكو ئێك ژ كەسایەتیێن هەرە گرنگ دهێتە ناسین، كو رۆلەكێ ئێكلاكەر د ناڤبەینكاری و دروستكرنا تەبایا نەتەوەیی دا هەبوویە.
ئیدریس بارزانی ل 31ی كانوونا دووێ یا سالا 1987ێ، د دەمەكێ دا گەلێ كورد د ئاوارەیێ دابوو، ل گوندێ سلیڤانا یێ ب سەر باژێرێ ورمێ ڤە مالئاڤیی كر و ل دەستپێكێ ل گۆڕستانا باژێرێ شنۆ ل تەنشت بابێ خۆ، مستەفا بارزانیێ نەمر، هاتە ڤەشارن.
پشتی سەرهلدانا مەزنا سالا 1991ێ، وەكو وەفاداریەك بۆ خەبات و قوربانیدانا وان، ب بڕیارا سەركردایەتیا پارتی دیموكراتی كوردستان، د تشرینا ئێكێ یا سالا 1993ێ دا تەرمێن پیرۆز یێن بارزانیێ نەمر و كاك ئیدریسێ هەردەم ساخ، د رێورەسمەكێ نیشتیمانی و ب شكۆ دا ژ رۆژهەلاتێ كوردستانێ هاتنە ڤەگوهاستن و ل گوندێ بارزان، د هەمبێزا نیشتیمانی دا هاتنە ڤەشارتن.
