كاك ئدریس بارزانی كێـم ژیا، لێ مەزن ژیا
مەكتەبا رێكخستنا پارتی ل پارێزگەها دهۆكێ ب هەلكەفتا 39مین مالئاڤاییا ئدریس بارزانی پەیامەك بەلاڤكر و تێدا هاتیە: بەری 39 سالان ل 31ی كانوونا دووێ یا سالا 1987، پارتی دیموكراتی كوردستان و بزاڤا ڕزگاریخوازییا گەلێ كوردستانێ، د دەمەكێ گەلەك هەستیار دا ئێك ژ سەركردەیێن خوە یێن هەرە مەزن ژ دەست دا؛ ئەوێ سەرۆك مەسعود بارزانی د وەسفكرنا ویدا دبێژیت: «مرۆڤەكێ گەلەك مەزن بوو، مەزناهییا وی ژی ژ تێگەهشتن و پێگەهشتنا وی هێزا خۆ وەردگرت».
ئاشكرا ژی كریە، كاك ئیدریس بارزانی د هەمی وەستگەهـ و قووناغێن شۆڕەشا گەلێ مە دا، ڕۆلەكێ كاریگەر و مێژوویی هەبوو، د ناڤ ڕێزێن شۆڕشا ئەیلۆلێ دا، د بیاڤێ كار و دیسپلینا حزبی و لەشكری دا، كارەكتەرەكێ خودان سەنگ و هاریكارێ نێزیك و جهێ باوەریا بارزانیێ نەمر بوو، كاك ئدریس، مل ب ملێ جەنابێ سەرۆك مەسعود بارزانی، پشكدارەكێ سەرەكیێ دانوستاندنێن شۆڕشێ بوو، ل گەل حكومەتا ئیراقێ، كو رێككەفتننامەیا 11ی ئادارا 1970ێ بەرهەمێ وێ كەد و تێكۆشانێ بوو.
دیسا خویا ژی كریە، پشتی شكەستنا شۆڕەشا ئەیلۆلێ ژی، ڕۆلەكێ بەرپرسیارانە د هاریكاریكرنا پەنابەر و كۆچبەرێن ل ڕۆژهەلاتێ كوردستانێ و ئیرانێ گێڕا، بوو هەلگرێ ئێش و ئازارێن خەلكێ لێقەومایی، كاك ئدریس ل گەل جەنابێ سەرۆك مەسعود بارزانی، ب ئیرادەیەكا پویلایی ل هەمبەر پیلانگێڕیێن دوژمنان ڕاوەستان و كەتوارێ سەپاندیێ پشتی شكەستنێ رەتكر، ژ بەر باوەرییا وی یا كوور ب خەباتا هەڤپشك و بەرچاڤگرتنا بەرژەوەندیێن بلندێن نەتەوەیی، كاك ئدریس گاڤێن ژیرانە د چەسپاندنا ئاشتەوایا ناڤخۆیی دا هاڤێتن و بەری بنیاتێ «بەرەیێ كوردستانی» دانا، لەوما ب شانازی ڤە نازناڤێ «ئەندازیارێ ئاشتیێ» پێ هاتە بەخشین.
مەكتەبا رێكخستنێ د پەیاما خۆ دا دیاركریە كو كاك ئدریسێ جانەمەرگ، دەرچوویێ قوتابخانەیا نەتەوەیی و نیشتمانی و هەلگرێ هەمی ساخلەتێن رێبەرێ مەزن بارزانیێ نەمر بوو، هەرچەندە ئەو كێم ژیا، لێ مەزن ژیا و میراتەكێ زەنگینێ شۆڕەشگێڕی، كوردایەتی، حیكمەت و وانەیێن مروۆڤایەتیێ ل پاش خوە هێلا.
د پەیاما مەكتەبا رێكخستنێ دا هاتیە: «ئەم وەكو مەكتەبا رێكخستنا پارتی ل پارێزگەها دهۆكێ، د 39 سالڤەگەرا وەغەرا دووماهیێ یا كاك ئدریسێ جانەمەرگ دا، ب رێز و وەفاداری ڤە رۆل و خەباتا وی ب بیر دئینین، سەرێ رێزێ بۆ وی و تەڤایا شەهیدێن ڕێیا ئازادی و سەرفەرازیا گەلێ كوردستانێ و سەر كاروانێ شەهیدان بارزانیێ نەمر دچەمینین.
