پڕۆژەیێ چێكرنا رێكێن ناڤخوەیـی ل قەدشێ دهێتە بجهینان
ئامێدیێ، مەحمود نهێلی:
پڕۆژەیێ چێكرن و قێركرنا هەژمارەكا جادەیێن ناڤخوەیی ل كۆمەلگەها قەدشێ یا سەر ب ناوچەدارییا سەرسنكێ ڤە ل ژێر بجهئینانێ یە و گەهشتیە قووناغێن دووماهیێ، ئەڤە ژی د چارچوڤێ گەهاندنا پڕۆژەیێن خزمەتگوزاری دایە بۆ دەڤەرێن دووری دەست، ب مەرەما خزمەتكرنا وەلاتیان.
رێڤینگ عادل، سەرۆكێ باژێرڤانیا قەدشێ بۆ رۆژناما ئەڤرۆ دیا كر: بەرنامەیێ كابینەیا نەهێ یا حكومەتا هەرێما كردستانێ، گرنگیدانە ب پڕۆژەیێن خزمەتگوزاری و خزمەتكرنا وەلاتیان و گۆت: «د ڤی چارچوڤەی دا، پڕۆژەیێ چێكرنا هەژمارەكا زۆرا جادەیان ل سنۆرێ باژێرڤانیا وان ل ژێر بجهئینانێ یە و هندەك جادە ژێ تمامبووینە و كەفتینە د خزمەتا وەلاتیان دا».
ناڤهاتی ئاشكرا ژی كر، پڕۆژە ژ 28 جادە و كۆلانێن دو تاخێن كۆمەلگەهێ پێك دهێت و ب گوژمێ 906 ملیون دیناران ل سەر بۆدجا تایبەتا پارێزگەها دهوكێ دهێتە بجهئینان و گۆت: «درێژاهیا پڕۆژەی دبیتە سێ هزار و 500 مەتر، و 80% ژ ڤان جادەیان هاتینە قێركرن و كولانێن مایی ژی دهێنە كۆنكرێتكرن و ب تمامبوونا پڕۆژەی، هەژمارەكا زۆر یا وەلاتیان دێ ژێ مفادار بن».
