ب ئامادەبوونا پارێزگارێ دهۆكێ دەزگەهێ روانگە پێشانگەهەکا پرتووکان ڤەکـر
ب ئامادەبوونا د. عەلی تەتەر، پارێزگارێ دهۆكێ و خانم دكتۆرە ڤیان سلێمان، هاریكارا بەرپرسێ مەكتەبا ڕێكخستنا پارتی ل پارێزگەهێ و حەسەن شێخ عەلائەدین، ڕێڤەبەرێ جێبەجێكارێ دەزگەهێ ڕوانگە و جێگرێن پارێزگارێ دهۆكێ و هەژمارەكا ڕێڤەبەر و نوونەرێن دام و دەزگەهێن حزبی و حكومی و ڕەوشەنبیری و نڤیسەر و هونەرمەند و قوتابی و گەنج و لاو و حەژێكەرێن خواندنا پرتووكان، دوهی 2/2/2026 دەزگەهێ ڕوانگە ب هەڤكاری ل گەل ڕێڤەبەریا ڕاگەهاندن و چاپ و بەلاڤكرنا دهۆكێ، ل ژێر درووشمێ «خواندن هەناسەیەكا ئازادە د سینگێ وەلاتی دا» گەڕا نەهێ یا پێشانگەها پرتووكان، ل هۆلا كۆنفرانسان یا زانكۆیا دهۆك ڤەكر و بۆ ماوێ پێنج ڕۆژان دێ بەردەوام بیت.
پارێزگارێ دهۆكێ د پەیڤەكێ دا بناڤێ حكومەتا هەرێما كۆردستانێ دەستخۆشی ل دەزگەهێ ڕوانگە و هەڤكارێن د گەل دا كر، پاش بەحسێ گرنگیا زمان و كلتۆر و پێشڤەچوونا سێكتەرێ ڕەوشەنبیری و پشتەڤانیا بەردەوام یا چاپكرنا پرتووكان و پشتەڤانیا نڤیسەرێن د بیاڤێن جودا دا پرتووكێ دنڤیسن كر و گۆت: «د ڤان سالێن بۆری دا نێزیكی 100 پرتووكان ل پارێزگەها دهۆكێ هاتینە چاپكرن و دێ بەردەوام پشتەڤانیێ لێ كەین، ژ بەركو ئەم دخوازین، بەردەوامی ب نڤیسین و خواندن و چاپكرنێ بهێتەدان».
