تەكنەلۆژیا.. ئەو شیرێ جیهان نێزیك كری و مرۆڤ ژ ئێك دوورخستین!
بیلال ئومان ئیسلام
د سەدێ بیست و ئێكێ دا، تەكنەلۆژیا تنێ ئامرازەك نینە بۆ كاركرنێ، بەلكو بوویە پارچەكا سەرەكی و دانەبڕاو ژ ژیانا مە یا رۆژانە، ژ وێ گاڤا ئەم سپێدێ ل بەر دەنگێ مۆبایلێن خۆ رادبین هەتا ئەو دەمێ شەڤێ ئەم ل بەر شاشەیان دنڤین، ئەم د ناڤ جیهانەكا دیجیتاڵی دا دژین، ئەڤ شۆڕشا تەكنەلۆژی گۆڕانكاریێن مەزن د سیما و پێكهاتێ جڤاكی دا چێكرینە و كارتێكرنەكا كویر ل سەر پەیوەندیێن مرۆڤایەتی دروست كریە، كو وەك شمشێرەكێ دو دەڤ كار دكەت.
لایەنێن گەش: ئاسانكاری و دەلیڤەیێن نوی
تەكنەلۆژیایێ ژیانا مە گەلەك ب ساناهی كر و گەلەك كارێن ب زەحمەت بۆ مە ئاسان كرینە، مەزنترین مفا ئەوە كو ئێدی جیهان هەمی یا د ناڤ دەستێن مە دا، ئەم دشێین ب ڕێیا ئینتەرنێتێ فێری هەر تشتەكێ ببین بێی كو بچینە جهێن دوور، ژ لایێ ساخلەمیێ ڤە، ئامێرێن نوی یێن پزیشكی بووینە ئەگەر كو گەلەك نەخۆشی بهێنە چارەسەركرن و ژیانا مرۆڤان بهێتە پاراستن هەروەسا تەكنەلۆژیایێ دەرگەهێن كار و دەلیڤەیێن نوی بۆ گەنجان ڤەكرینە كو دشێن ژ ناڤمالێن خۆ كار بكەن و داهاتەكی بۆ خۆ پەیدا بكەن ب كورتی، تەكنەلۆژیا بوویە هاریكارەكێ مەزن دا كو مرۆڤ ب كێمترین دەم بگەهیتە ئارمانجێن خۆ.
لایەنێ تاری: دابڕانا د ناڤ قەرەبالغیێ دا
سەرباری ڤان هەمی ئاسانكاریان، تەكنەلۆژیایێ كۆمەكا ئالۆزیان ژی بۆ بەها و نەریتێن جڤاكی دروست كرینە، ئێك ژ وان مەترسیان «ژێكڤەبوونا جڤاكی»یە، مرۆڤ گەلەك یێ د ناڤ جیهانا خەیالی دا نوقم بووی و پەیوەندیێن راستەوخۆ یێن د ناڤبەرا خێزان و هەڤالان دا لاواز بووینە، ئامار نیشان ددەن كو ئالۆدەبوونا ل سەر سۆشیاڵ میدیایێ هەستێ «تەنێبوونێ» د ناڤ گەنجان دا ب ڕێژەیا پتر ژ 30% زێدە كریە، زێدەباری هندێ بكارئینانا زێدە یا شاشەیان ب شەڤێ و كوالێتییا خەوێ ب ڕێژەیا 40% كێم دكەت و كارتێكرنەكا نەرێنی ل سەر ساخلەمیا دەروونی دروست دكەت.
هەڤسەنگی كلیلیا ژیانێ یە
نابیت ئەم بێژین تەكنەلۆژیا ب تەمامی یا «باشە» یان «خرابە»، چونكی ئەو تنێ ئامرازەكە د دەستێ مە دا، ئەوا پاشەڕۆژا جڤاكێ مە دیار دكەت، ئاستێ هوشیاریا مە یە د بكارئینانا وێ دا. بۆ هندێ كو جڤاكەكێ ساخلەم مە هەبیت، پێدڤیە ئەم فێری «رەوشتێ دیجیتاڵی» ببین و بزانین كا كەنگی پێدڤیە شاشەیان بكوژینین و ڤەگەرین ناڤ ژیانا راستەقینە، پاشەڕۆژ یا وان كەسانە یێن دزانن كا چاوا د ناڤبەرا «شاشەیێن سار» و «پەیوەندیێن گەرمێن مرۆڤایەتی» دا هەڤسەنگیێ ڕابگرن.
