چەند نیشانێن بەر بەلاڤ یێن پەنجەشێرێ
بەرپەرێ ساخلەمیێ:
کێمبوونا کێشێ ب بێ ئەگەر:
هەکە تە پتر ژ ٥ کیلۆیان ژ کێشا خۆ ژ نشکەکێڤە کێمکرن، بێ کو پارێزێ (ڕێجیمێ) یان وەرزشێ بکەی، ئەڤە پێدڤى ب هایداریێ یە. پتریا جاران ئەڤێ چەندە پەیوەندى ب پەنجەشێرا مەعیدێ، پەنکریاسێ، یان سیهان ڤە هەیە.
وەستیان و ماندووبوونا بەردەوام:
مەرەما مە نە ماندووبوونا ئاسایى یا پشتى کارەکێ گرانە، بەلکو ماندووبوونەکا زۆرە کو ب نڤستن و بێهنڤەدانێ ژی ناچیت. دبیت نیشانەکا دەستپێکێ یا پەنجەشێڕا خوینێ (لوکیمیا) یان یا قولۆنى بیت.
گوهۆڕین د پیستى دا:
چاڤدێریا خالێن (نمەکێن) لەشێ خۆ باش بکە. هەر خالەکا ڕەنگێ وێ، قەبارێ وێ، یان شێوێ لێڤێن وێ بگوهۆڕیت، یان دەست ب خوینبەربوونێ بکەت، دبیت نیشانەکا پەنجەشێرا پیستى بیت. هەروەسا زەربوونا پیستى و چاڤان دبیت ئاماژە بیت بۆ ئاریشەکا جەگەرێ.
گرێ یان ستویربوونەکا ل ژێر پیستى:
پەیدابوونا گرێیێن ڕەق و ب بێ ئێش، ب تایبەت د مەمکى، گونان، یان گرێیێن لیمفاوى دا (بن کەفش یان ستۆی). هەر گرێیەکا نوو دڤێت ئێکسەر پشکنین بۆ بهێتە کرن.
کۆخکەکا بەردەوام یان گوهۆڕینا دەنگى:
ئەو کۆخکا بۆ زێدەتر ژ ٣ یان ٤ حەفتیان بەردەوام بیت ب بێ ئەگەرەکێ دیار (وەک پەرسیڤی)، یان گوهۆڕینا نێبرەیا دەنگى کو “نوسى” ببیت ب بەردەوامى، دبیت پەیوەندى پەنجەشێرا سیهان یان گەوریێ ڤە هەبیت.
گوهۆڕین د عاداتێن دەستئاڤێ دا:
زکچوون یان قەبزیا بەردەوام بۆ دەمەکێ درێژ، یان گوهۆڕینا شێوێ پیساتیێ، یان هەبوونا خوینێ د پیساتیێ دا (ڕەنگێ ڕەش یان سۆر)، ئەڤان هەمی نیشانان پێدڤى ب پشکنینا قولۆنى هەیە. هەروەسا زێدە چوون بۆ دەستئاڤێ یان ئێشان ل دەمێ میزکرنێ دبیت پەیوەندى ب پڕۆستاتێ یان میزدانێ ڤە هەبیت.
ب زەحمەت داعویڕانا خوارنێ یان تێکچوونا هەرسێ ب بەردەوامى:
هەستکرن ب هندێ کو خوارن د گەریێ دا “دگێریت”، یان سۆتنا بووریا (خوارنێ) یا بەردەوام کو ب دەرمانان چارەسەر نەبیت، دبیت نیشانەکا پەنجەشێڕا مەعیدێ بیت.
خوینبەربوونا نە ئاسایى:
وەک کۆخکا ب خوین، هەبوونا خوینێ د میزێ دا، خوینبەربوونا زێدە یا ژنان ل دەرڤەى دەمێ (عادێ) یان پشتى ژیێ بێئۆمێدیێ، یان خوینبەربوون ژ سەرێ مەمکى.
تایا بەردەوام یان خوهدانا شەڤێ:
تایا ب بێ ئەگەر کو دهێت و دچیت، و خوهدانا شەڤێ یا زۆر ب رەنگەکێ کو جلکان تەڕ بکەت، دبیت ژ نیشانێن پەنجەشێڕا سیستەمێ لیمفاوى بن.
برینێن ساخ نەبن:
ئەو برینێن د دەڤى دا پەیدا دبن، یان برینێن پیستى یێن کو خوین ژێ دهێت و بۆ چەندین حەفتیان ساخ نابن، پێدڤى ب پشکنینەکا پزیشکى نە.
ئێشەکا بەردەوام کو ژ ناڤ ناچیت:
ئێش ڕێکا لەشى یە بۆ گۆتنا هندێ کو تشتەکێ خەلەت یێ هەی. سەرئێشەکا ب دەرمانێن ئێشکوژ چارەسەر نەبیت، ئێشا پشتێ یا بەردەوام، یان ئێشا زکى. (پتریا جاران ئێش نیشانەکا قۆناغێن پێشکەفتی یە، بەلێ هندەک جاران نیشانەکا دەستپێکێ یە د پەنجەشێرا هەستیان یان گونان دا).
وەرمینا زکى یا بەردەوام (بۆ ژنان):
هەستکرن ب تێربوونێ ب زووى پشتى خوارنا ژەمەکێ کێم یێ خوارنێ، و وەرمینا زکى یا بەردەوام، دبیت نیشانەکا هایدارکرنێ بیت بۆ پەنجەشێرا هێکدانان (ovarian cancer).
تێبینی: هەبوونا ئێک ژ ڤان نیشانان مەرەم پێ ئەوە نینە کو حەتمەن پەنجەشێرە، بەلکو ئاماژەکا هایداریێ یە کو پێدڤى ب سەرەدانا دکتۆرى دکەت.
