مرنەکا نە دیار
دلدار محەمەد
ئیلهاما هەلبەستەکێ وەک مێڤانەکێ بێ ژڤان سەرەدانا وی کر، دەفتەرکا خۆ یا بیرهاتنان ئینا دەر، ژ نشکانڤه هندەک پەیڤێن نڤیسی ل پشتا پەڕکەکی دیتن:
«موەلیدە = شێست هزار
زارۆک و قوتابخانە = سەد هزار
دەرمانێن ڤێ مەهێ = حەفتێ و پێنج هزار»
بیرا وی هات كو ئەڤە قەرێن مەها بۆرینە؛ چونکی یێن ڤێ مەهێ گەلەک پتر بوون. هەلبەت دگەل ڤێ نڤیسینێ داخوازییا خودانێ مارکێتێ ژی هاتە بیرێ هەکو ڤێ سپێدێ گۆتییێ :
– جیران، بەرپەڕێ تە پر بوو..! هەکە تە هندەک ئینابان دا مەمنوون بم.
ئەڤێ شێل و بێلێ پەیڤێن بۆ هاتین کرنە بالندە و ژ جیهانا وی یا خەمگین بلەز و بەز فڕدا..
پەڕ قولپاند و خەما سەرەدانا هەناسەیا وی کر و نڤیسی:
ئێ ما تە خۆ وەستاند، تو بخودێ خۆ وەستاندنێ د جڤاکەکی هۆ دا چ واتا هەیە کو ب پلەکێ چوونا سەرێ ملەکێ واتایا سەرکەفتێ بیت؟! دەست دانانا سەربرینێ خال دانانا سەر پیتا واتایا رەشبینی و ژێ دووربوونێ بیت!
هەمی کارو بارێن خۆ ل پشت دەرگەها و ل پشت پەردێن رەش دکەت، ل بەر مایکێ دبێژیته خەلکی یێ گەشبین بە.
چایچییێ وی ـ ژ نەچاری ـ دەرچوویێ ئادابا ئنگلیزییێ یە، ئەوی دووێ ناڤنجی ژی نەدیتی یە، وێ رۆژێ هەکو باس هاتیە سەر وەستیانێ و بێ بەرهەمییێ، ل دەستپێکێ گڕنژی، پاشی ب کەنییەکا ترانکی ڤە گۆتێ: هوین گەنجێن ڤێگاڤێ مرۆڤێن سست و خاڤن، یا پێدڤییە تە ژی وەکی من ئیرادە هەبیت !
سپیدێ هەکو ئەلند ژ خەورابووی و دەستێ خۆ دایه بن گوهێ خۆ و سترانا هەلاتنێ گۆتی، هەردو زارۆکێن وی ب زەنگلێن مۆبایلان دەست ژ خەوێ بەردان؛ دا بچن ل قوتابخانەیێ تەڤنێ پاشەرۆژێ برێسن.
بابێ خۆ ل نیڤا ژۆرێ دیت تەرم، قێریان سپێدە ژ خەو راکر هێشتا وێ چاڤێن خۆ نه پەرخاندین، ئەوان خۆ ل بەردەرگەهێ نەخوشخانێ دیت.
پەیڤدارێ پۆلیسان ل پشت وێ کۆما مەزن یا مایکان ب دەنگەکێ نیڤ قێری ڤە گۆت:
– ببۆرن، راستە شینوارێن چ برینان لسەر لەشێ وی نینن، بەلێ هێشتا ئەگەرێن مرنا وی نه هاتینە زانین.
