چارەنڤیسێ خولا باسكێت بۆلا ئیراقێ دیار نینە
د داخویانیەكێ دا ڕاهێنەرێ تیما باسكێت بۆلا یانەیا زاخۆ بێ ئۆمێدییا خوە دیاركر كو د وەرزێ ئەڤ سالە دا دەست ب هەڤڕكیێن وەرزێ نوو یا خولا نایابا ئیراقێ بهێتە كرن و ئەگەرێن وێ ژی ڤەگەڕاندن بۆ هەبوونا ناكۆكییان و هیڤی خواست نە بیتە ئەگەر دربەك ب یاریزانان ب كەڤیت.
زێدەتر جوتیار عەلی بۆ رۆژنامەیا ئەڤرۆ گۆت: ب مخابنی ڤە ل سالێن بۆری ئاستێ باسكێت بۆلا ئیراقێ و كوردستانێ هێدی بەر ب باشیێ دچوو، لێ پشتی گوهۆڕینێن دناڤا فدراسیۆنا باسكێت بۆلا ئیراقێ چێبووین و ئەندامێن دەست ژ كار كەڤتی ناكۆكی دگەل ئەندامێن دەستەیا كاتی یا فدراسیۆنێ كرن و گەهشتە وێ ڕادەیی وەزارەتا وەرزش و لاوان ژلایەكی و لژنەیا ئۆلمپییا ئیراقێ ژ لایەكێ دووڤە مایتكرنێ بكەن بوو ئەگەر هەموو چالاكیێن فدراسیۆنا باسكێت بۆلێ ب ڕاوەستیین، ئەڤچەندە ژی دڕبەكە و تاوانەكە دژی یاریزانێن باسكێت بۆلێ نە.
هەروەسان ناڤهاتی گۆت: مایتكرنا سیاسی و بەرژوەندیێن كەسكۆی وەكر كو هەتا نوكە هیچ دەرگەهەكێ هیڤی و ئۆمێدا نەبیت خول بهێتە ڤەكرن، سەرباری پێشتر هاتبووینە ئاگەهداركرن كو خول دێ د وەختێ خوە دا هێتە ئەنجامدان ل چریا ئێكێ یا سالا 2025ێ لێ ئەڤە ئەم بۆ مەها چارێ یە هێش چو پێنگاڤ نە هاتینە هاڤێژتن، هەكە بڤی شێوەیی بیت وەرزێ ئەڤ سالە خول نا هێتە كرن.
ڕاهێنەرێ زاخۆ خەمگینییا خوە بەرانبەر یاریزانان دا دیاركرن و گۆت: چو گونەها ئەڤان یاریزانان هەیە كو رۆژانە دهاتنە ڕاهێنان ب هیڤییا وێ یەكێ ژڤانێ خولێ دەستپێبكەن، هەروەسان دێ چەوا یاریزانێ لاوا و تازەپێگەهشتی باوەری هەبیت كو بڤی شێوەیی دێ پشكداری خول و قارەمانییان بیت، چ شێوە دێ باوەری ب وەرزشا خوە هەبیت.
ل دووماهیێ ناڤهاتی گۆت: هیڤییا مە ئەوە فدراسیۆنا باسكێت بۆلا كوردستانێ ڤێ ڤالاتیێ پر بكەن پشتەڤانییا یاریزانێن ڤێ یاریێ بكەن بۆ دانانا خول و قارەمانییان، ل سەر ئاستێ كوردستانێ یاریزانێن باش هەنە، ڤەكرنا قارەمانیێ دێ بیتە ئەگەرێ پشتەڤانی بۆ شیان و ئاست و هیڤیێن وان.
هەژی گۆتنێ یە تیما یانەیا زاخۆ قارەمانا وەرزێ بۆری یا خولا كوردستانێ ل د خولا نایابا ئیراقێ دا ڕێزا پێنجێ ب دەستڤە ئینابوو، ڕێژەیا یاریزانێن باژێرێ زاخۆ گەلەك باش دناڤ تیمێ دا هەنە
