ئاراز سالح: كچێن دهۆكێ د ڕژدن ناسناڤەكێ دی بۆ پارێزگەهێ بینن
د داخویانیەكێ دا ڕاهێنەرێ تیما یانەیا ئافرەتێن دهۆكێ دیار كر بەرهەڤیێن وان بۆ قارەمانییا ئیراقێ یا فوتبۆلا بچووكری بۆ شەش یاریزانی د ئاستەكێ باش دانە سەرباری د دەمەكێ كورت دا هاتینە ئاگەهداركرن بۆ قارەمانیێ، ئەوا بڕیارە سوبەهی هەڤڕكیێن وێ ل پارێزگەها دهۆكێ ب پشكدارییا زێدەتری هەشت یانەیێن هەرێما كوردستانێ و ئیراقێ ژلایێ فدراسیۆنا فوتبۆلا شەش یاریزانی ب هەڤكارییا ڕێڤەبەرییا وەرزش ل دهۆكێ هێتە ئەنجامدان.
زێدەتر ناڤهاتی بۆ رۆژنامەیا ئەڤرۆ گۆت: هەرچەندە ئەم ژلایێ فدراسیۆنا فوتبۆلا شەش یاریزانی زوو نە هاتبووینە ئاگەهداركرن بتنێ ئەڤە چار رۆژە ڕاهێنانان دكەین و سوبەهی قارەمانییە ئانكو بۆ پێنچ یەكەیێن ڕاهێنانێ مە ئەنجامداینە، لێ هەرچەوابیت بەرهەڤیێن مە د باشن، د ڤی دەمێ كورت دا مە دگەل یاریزانێن خوە كارەكێ باش یێ كری.
هەروەسان ئاراز سالحی گۆت: ئەڤ قارەمانییا یا جودایە ژ قارەمانیێن دی یێن فوتسالێ، هەموو یاریزانێن مە شیانێن وان باشترن د فوتسالێ دا و دو سالان ل دووڤ ئێك ناسناڤێ كوردستانێ و ئێكا پارێزگەهێ ب دەستڤە ئینایە، دێ بزاڤێ كەین ناسناڤەكێ دی بۆ وەرزشا كچان زێدەكەین.
ژلایەكێ دووڤە گۆت: شێواز و تەپا قارەمانیێ جوداهییەكا مەزن هەنە دبیت ئاستەنگ هەبن و یاریزانێن مە ستایلێ فوتسالێ باشتر بووینە و بۆ ومان دێ پشكداریەكا نوو بیت ژ قارەمانیێن پێشتر، لێ د رۆژێن بۆری دا مە كار ل سەر هندێ كر د ڤان یاریگەهان دا دێ چەوا شێن شێوازێ یارییا شەش یاریزانی یا یاریگەهێن تارتانی بكەن
ل دووماهیێ ڕاهێنەرێ یانەیا ئافرەتێن دهۆكێ گەشبینییا خوە دیار كر و گۆت: من باوەرییەكا مەزن ب ئاستێ یاریزانێن خوە هەیە مە دو سێ یاریزان ئیناینە لێ دبیت هێتە پێشبینیكرن یانەیێن هەڤڕك هەبن و قارەمان.
