ئەربیلوا ل مهدرید د ناڤبەرا گومانێن بێرنابیۆ و سیبهرا مۆرینیۆی دا
چاڤشین دهۆکی
پشتی خاترخاستنا چابی ئهلۆنسۆ بهر ب قووناغهكا نوو كارگێرییا ڕیال مهدرید بڕیارهكا ب وێر دا و كلیلێن كهلها سپی ڕادهستی كوڕێ یانهیێ ئهلڤارۆ ئاربیلۆا كرن ههرچهنده ئاربیلۆا وهكۆ یاریزان خودان ئەزموونە لێ وهك ڕاهێنهرێ تیما ئێكێ خۆ د ناڤ تاقیكرنهكا ئاگرین دا دبینیت كو ل وی جهی ڕهحم نه هاتیه نیاسین.
بومبهیا ئهلباسێتی و پەقینا توڕهییا جهماوهری
دهستپێك ب شكهستنهكا نەچاڤەڕێکری ل کۆپا شاهێ ئسپانییا بهرامبهر یانهیا ئهلباسێتی ئهو شكهستنه تنێ ژ دهستدانا ناسناڤهكی نهبوو بهلكو ژ دەستدانا باوەریێ بوو وهكۆ هەڕفینەکێ ل دەف جەماوەرێن مهدرید هاته وهرگرتن ل یاریگهها سانتیاگۆ بێرنابیۆ دیمهنهكێ وهسا دروست بوو كو سالانه نههاتیه دیتن تۆفانا فیتكێن نهڕازیبوونێ دهمێ یاری ب دووماهی هاتی دهنگێ فیتكێن جهماوهری ئهسمانێ مهدرید ههژاند ئاڵایێن سپی (S.O.S): جەماوەری ل شوینا هاندانێ ئاڵایێن سپی بلند كرن وهكۆ ئاماژهیهك بۆ حالهتێ نهمانا باوهریێ ب پلانێن کارگێریێ و سەروکێ یانەیێ فیورێنتینو پێرێز.
لالیگا: چریسکەکا هیڤیێ د ناڤ تاریێ دا
پشتی وێ شۆكا مهزن ئاربیلۆا شییا هندهك ب هۆش خۆ دا بهێت ب سێ سهركهفتنێن گرنگ (دو ل لالیگا و ئێك ل چامپیۆنزلیگ ل سهر مۆناكۆ) و تۆماركرنا ١٠ گولان تیمهك بۆ جهمسهرێ هەڤڕکیێ ڤهگهڕیا و ب جوداهییا تنێ خالهكێ كهفته ڕێزبهندییا دووێ ل ڤێره پرسیارهك سهرههلدا: ئهرێ ئاریشه چابی ئهلۆنسۆ بوو یان ئاربیلۆا بڕینا مهدرید دهرمان كر؟
شۆكا لۆكسمبۆرگ: مۆرینیۆ برینێن مهدرید کەلاندنەڤە
ئهو هیڤییە گەلەک ڤەنەکێشا و چریسک ڤەمری د چامپیۆنزلیگێ دا ئاربیلۆا بهرامبهر مامۆستایێ خۆ یێ بەرێ جۆزێ مۆرینیۆ و یانهیا «بهنفیكا» ڕاوستییا مۆرینیۆ ئهو كهسێ كو بناغێ سهردهمێ زێرین یێ مهدرید دانای ڤێ جارێ وهك نهیار هات و ب ئهنجامێ (٤-٢) قوتابیێ خۆ «ئاربیلۆا» شهرمزار كر
پلەی ئۆف: یان تۆڵڤهكرن یان مالئاڤایی
ژبهر ڤێ دۆڕاندنێ ڕیال مهدرید نەچار بوو بچیته قۆناغا «پلەی ئۆف» و ژیانێ دهرفهتهكا دڕامی دا ئاربیلۆا: دیسا بهرامبهر بهنفیكا و مۆرینیۆ! ئهڤه ئێدی نه بتنێ یارییهكا تهپاپێیه بهلكو شهڕێ مان و نهمانێ یه بۆ ئاربیلۆا ئهرێ ئاربیلۆا دێ شێت لایهنێ دهروونی یێ جهماوهرێ توڕه هێمن کهت و تۆڵا خۆ ژ «سپێشهڵ وهن» ڤهكهت؟ یان ژی دێ بێرنابیۆ ب ئاڵایێن سپی و فیتكێن توندتر مالئاڤایێ ل كوڕێ خۆ یێ کەڤن كهت؟
