دادڤانەكێ كوردستانی بوو باشترینێ ئاسیا
قەیس وەیس:
فدراسیۆنا فوتبۆلا ئاسیا ب فەرمی دادڤانێ كوردستانی یێ نێڤدەولەتی هاوكار سالار وەكو باشترین دادڤان ل سەر ئاستێ ئاسیا هاتە دەستنیشانكرن، پشتی شیایی ب سەركەڤتیانە یارییا فینالا ئاسیا یا فوتسالێ دناڤبەرا هەلبژارتیێ ئەندۆنیزیا و ئیرانێ بڕێڤە ببەت، د هەڤڕكیێن قارەمانییا ئاسیا 2026ی ئەوا ل چاكارتا پایتەختێ وەلاتێ ئەندۆنیزیایێ هاتیە كرن.
ل دۆر ڤێ یەكێ عەلی عەبدولحسێن سەرۆكێ لژنەیا فوتسالێ ل فیدراسیۆنا فوتبۆلا ئیراقێ كەیفخوەشیا خوە دیار كر و گۆت: بڕێڤەبرنا یارییا فینالا ئاسیا ژلایێ دادڤانێ مە هاوكار سالار جهێ دلخوەشیێ و سەرفەرازیێ یە بۆ وەرزشڤان و گەلێ ئیراقێ و كوردستانێ، شیا ب ئاست و شارەزاهییا خوە پێنچ یاریێن گرنگ و بهێز د كۆپا ئاسیا یا 2026ێ ب ڕێڤەببەت و گرنگتر ببیتە جهێ باوەرییا فدراسیۆنا فوتسالا ئاسیا كو یارییا فینالێ ژ دناڤبەرا هەلبژارتیێ ئەندۆنیزیا و ئیرانێ بڕێڤەببەت و دەستخوەشی لێ بهێنە كرن و دووڤدا وەكو باشترین دادڤانێ ئاسیا بهێتە خەلاتكرن.
ناڤهاتی ئەوچەندە ژی گۆت: ژ سەرجەمێ 16 دادڤانێن وەلاتێن ئاسیا ئەوێن پشكدار تاكە دادڤان بووی پلەیا زوور باش وەربگریت پێنەڤێت ئەڤە ژی بۆ وێ چەندێ ڤەدگەریت ژبەر شیان و ئاستێ وی یێ نێڤدەولەتی و شارەزاهییا وی د ڕێڤەبرنا یارییان دا، ئەز پێشبینیێ دكەم بۆ قارەمانییا جیهانی ژی دێ هێتە داخوازكرن، ئەڤەژی دەستكەڤتە بۆ وەرزشا ئیراقێ.
بۆ زانین خەلكێ باژێرێ سلێمانیێ یە هەر چەندین یاریێن گرنگ د قارەمانیێن عەرەبی و ئاسیا بڕێڤەبرینە، هەروەسان ل سالا 2014ێ دو یاریێن هەڤالینی یێن دناڤبەرا هەلبژارتیێ ئنگلتەرا و لاتیڤییا ب سەركەفتیانە بڕێڤەبرینە، بۆ ماوەیێ چار وەرزان ل دووڤ ئێك دادڤان بوو د خولا پرێمەرلیگ ل وەلاتێ ئنگلتەرا هەر ژ وەرزێ 2013-2014 هەتا 2016-2017ێ، یاریێن فینالا كۆپا ئنگلتەرا 2015ێ، فینالا خولا ئنگلتەرا 2016ێ و فینالا زانكۆیێن بریتانی 2017ێ بڕێڤەبرینە، د نوكە دا ئێك ژ دیارترین و دادڤانیێ باوەریێ یە د فیدراسیۆنا فیفایێ و ئاسیا دا.
