ئەڤرۆ د كۆپا كەنداڤی دا كوڕێن خابووری مێڤانێن ئەلقادسیە یا كوێتی نە
قەیس وەیس:
دهێتە چاڤەڕێ كرن ئەڤرۆ ل دەمژمێر نەهی شەڤ تیما فوتبۆلا یانەیا زاخۆ ڤەگەڕێتە هەڤڕكیێن كۆپا كەنداڤی دەمێ دبیتە مێڤانا یانەیا ئەلقادسیە یا كۆێتی ژ چارچووڤەیێ یاریێن گەڕا پێنچێ كو دبیتە یارییا دویێ یا چوونێ ژ هەڤڕكیێن كۆما ئێكێ یا قارەمانیێ ئەوا هەشت یانە پشكدارن و هاتینە بەلاڤكرن ل سەر دو كۆمان.
زاخۆ ل سەرێ لیستێ دهێت
تیما یانەیا زاخۆ ل سەرێ لیستا كۆما خوە دهێت ب كۆمكرنا 10 خالان ژ سێ سەركەڤتن، ئێك وەكهەڤی و هیچ خوسارەتیەك نە دایە، یاریزانێن وێ شەش گۆل كرینە و گۆلەك ل سەر هاتیە تۆمار كرن، یانەیا ئەلقادسیە ل ڕێزا سێیێ دهێت ب كۆمكرنا چار خالان ژ سەركەڤتنەك، وەكهەڤییەك و دو خوسارەتی، ئەوا یانەیا ئەلعەین یا ئیماراتی ل ڕێزا دویێ دهێت ب شەش خالان و سترە یا بەحرێنی ب دو خالان ڕێزا چارێ و دووماهیێ دهێت.
ئەنجامێن كوڕێن خابووری
د كۆپایێ دا
ب شێوەیەكێ گشتی تیما زاخۆ چار یاری كرینە و ئەنجام بڤی شێوەینە، دگەل ئەلقادسیە 3-1 ب سەركەڤت بوو ئەوا ل یاریگەها یانەیا دهۆكێ هاتیە كرن، دگەل خودانێن ئەردی سترە یا بەحرێنێ بێ گۆل وەكهەڤ دەركەڤتبوو، د یارییا سێیێ دا ل یاریگەها خوە زاخۆ ب دو گۆلێن پاقژ سەركەڤتن ل سەر عەین یا ئیماراتی ئینابوو، د قووناغا دویێ دا یانەیا زاخۆ یارییا دویێ بەرانبەر عەین ل ئیماراتێ ئەنجامدابوو و شیابوو ب سەركەڤیت ب گۆلەكێ بێ بەرانبەر، دهێتە پێشبینیكرن یارییا سێیێ و دووماهیێ ژ چارچووڤەیێ كۆمێ ل 17ێ ڤێ مەهێ مێڤاندارییا یانەیا سترە یا بەحرێنی بكەت.
یاریزانێ زاخۆ گەشبینە ب سەركەڤن
ل دۆر ڤێ یاریێ یۆسف ئەلئالۆسی یاریزانێ یانەیا زاخۆ گۆت: هەر یارییەكا ئەم بكەین بۆ مە گرنگە و فینالە، راستە ئەم یێن دەربازبووینە قووناغا چارێك دووماهیێ لێ دڤێت ڤێ یاریێ سەركەڤتنێ بینین ژبەر پاراستنا سەرێ لیستێ و دیسان ئاشتكرنا جەماوەرێ خوە پشتی ئەنجامێ ڤێ دووماهیێ یێ لاواز، یارییەكا ب هێزی و ئەم ڕژدین بۆ سێ خالان، هەرچەندە تیما ئەلقادسیە ژی دێ شەڕی بۆ سەركەڤتنێ كەت ژبەركو چاڤێ وان ژی ل پلێتەكا دەربازبوونێ یە.
هەروەسان ناڤهاتی گۆت: هەموو هیڤی و ئارمانجێن مە و كارگێریێ ئەون د وەرزێ ئەڤ سالە دا ئەم ناسناڤێ قارەمانیێ ب دەستڤە بینن، هەرچەندە ئەركێ مە ب سانەهی نینە، لێ كارەكێ مەزن بۆ دهێتە كرن، ب هیڤی نە ئەم مەزنترین دەستكەڤت بۆ جەماوەرێ خوە بینن، د نوكە دا یا گرنگ چاوانییا سەركەڤتنایە.
ژلایێ خوەڤە بەدر ئەلمتەوع ستێرا یانەیا قادسیە یا كوێتی گۆت: ئەڤ یارییە بۆ مە یا چارەنڤیسە و دڤێت ئەم سەركەڤتنێ بینن دا هیڤیێن دەربازبوونێ بۆ مە گەشتر بن، دێ دگەل تیمەكێ كەین كو ل یارییا قووناغا ئێكێ یا بۆری سەركەڤتن ل سەر تیما مە ئینا بوو، دڤێت قەرەبوو بكەین و نە هێلین چو خالان ژ دەست بدەین، تیما زاخۆ خودان پێكهاتییەكێ بهێزە و دەستكاركێشانا ڕاهێنەرێ وان باوەرنامەك كارتیكرنێ ل سەر ئاستێ وان بكەت.
كۆما دویێ ئاگرینە
ژلایەكێ دووڤە د كۆما دویێ دا بڕیارە سوبەهی یانەیێن ڤێ كۆمێ یاریێن خوە ژ چارچووڤەیێ گەڕا پێنجێ و بەری دووماهیێ بكەن و هەر چار یانەیان دەلیڤەیا دەربازبوونێ بەردەست هەیە، ئەوا بڕیارە یاریێن خوە یێن ڤێ گەڕێ بڤی شێوەیی بكەن، حەزرموت یا یەمەنی- رەیان یا قەتەری، ئەلنەهزە یا عومانی- ئەلشباب یا سعۆدی.
هەلوەستێ كۆما دویێ بڤی شێوەیە
1- ئەلریان شەش خال.
2- ئەلنزەهزە شەش خال.
3- تەزامن حزرموت چار خال.
4- ئەلشباب دو خال.
ئەمیندارێ گشتی یێ فدراسیۆنێ یاریێن ئەڤرۆ ب هێز دبینیت
جاسم ئەلرومێحی ئەمیندارێ گشتی یێ فدراسیۆنا كەنداڤی گۆت: یاریێن ڤێ قووناغێ یێن هەردو كۆمان بهێزن و دەلیڤەیە بۆ حەفت یانەیان هەنە، سێ یانەیێن كۆما ئێكێ و هەر چارێن كۆما دویێ ئەوژی ژبەر نێزكییا خالان، د كۆما ئێكێ دا زاخۆ مسۆگەر بوویە، لێ دناڤبەرا ئەلقادسیە و ئەلعەین دێ هەڤڕكییا پلێتا دویێ هەبیت، د كۆما دویێ دا هەر چار یانەیێن ڕەیان، ئەلنەهزە، تەزامن حەزرموت و شەباب دا هەیە، لەوما ژی یاریێن ڤێ گەڕێ دێ هەڤڕكییەكا بهێز بیت.
ژلایەكێ دووڤە ناڤهاتی دیاركر بزاڤێن دهێنە كرن كو ئارستەیی قارەمانیێ بەر ب پێنگاڤێن باش دچن تایبەت پشتی پشكدارییا یانەیێن ئیراقی دهۆك قارەمانا وەرزێ بۆری و یانەیا زاخۆ ئەوێن خودان جەماوەرەكێ ئێكجار مەزن، بۆ سالا بهێت دێ پێنگاڤێن باشتر هەبن و گرنگییەكا مەزنتر هێتە دان.
شەش یانە بووینە قارەمانێن كەنداڤی
ل دووڤ ئامارێن قارەمانییا كەنداڤی شەش یانەیا شیاینە ناسناڤێ قارەمانیێ ب دەستڤە بینن، ئەوا ئێكەم جار ل سالا 2011 هاتبوو كرن یانەیا ئەلشباب ئەلعرەبی یا ئیمارتی ببوو قارەمانا ئێكەم چاب، ل سالا 2012ێ یانەیا ئەلمەحرەق یا بەحرێنی ناسناڤێ دویێ یێ كۆپایێ بدەستڤە ئینابوو، ل چاپا 2013ێ یا سێیێ یانەیا بەنی یاس یا ئیماراتی بوو قارەمان، ل چاپا چارێ یا سالا 2014 یانەیا ئەلنەسر یا ئیماراتی ناسناڤی ب دەستڤە ئینابوو، ل چاپا پێنجێ یا سالا 2015 ئەلشباب ئەلعرەبی یا ئیماراتی دوبارە ڤەگەڕیا دەستكەڤتێ كۆپایێ و ناسناڤ ب دەستڤە ئینا، پشتی ڤێ قارەمانیێ بۆ ماوەیێ 10 سالان هەڤڕكی هاتنە ڕاگرتن، ل سالا 2024-2025ێ قارەمانی ب شێواز و سیستەمەكێ نوو ڤەگەڕیا، دڤێ قارەمانیێ دا یانەیا دهۆك شیا ئێكەم ناسناڤ بۆ وەلاتێ ئیراقێ و هەرێما كوردستانێ بینیت.
خەلاتێن قارەمانیێ دێ چەوابن؟
ل دووڤ لیستەیا پێشتر ژلایێ فدراسیۆنا فوتبۆلا كەنداڤی بەلاڤكری كو دهەمان وەرزێ بۆری دا بوو، بڕیار هاتیە دان خەلاتێن پشكداران هەتا دگەهیتە خودانێ ناسناڤی دێ بڤی شێوەیی بیت.
قارەمانا كۆپا كەنداڤی دێ سێ ملیۆن دۆلاران وەرگریت.
خودانا رێزا دویێ دێ ئێك ملیۆن دۆلاران وەرگریت.
باشترین یاریزانێ كۆپا دێ 50 هزار دۆلاران وەرگریت.
باشترین گۆلپارێز دێ خەلاتێ 50 هزار دۆلاران وەرگریت.
گۆلكەرێ قارەمانیێ ژی دێ 50 هزار دۆلاران وەرگریت.
هەر یانەكا پشكدار دێ سێ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ بینت ژی 30 هزار دۆلار هاتینە دانان.
بۆ زانین یانەیا زاخۆ وەكو نوونەرا ئێكانە یا كوردستانێ و ئیراقێ پشكداریێ د ڤێ قارەمانیێ دا كەت، ئەوا ل وەرزێ بۆری یانەیا دهۆك شیایی ب سەرفەرازی پشكداریێ بكەت و ناسناڤێ قارەمانیێ بۆ جارا ئێكێ د دیرۆكا خوە دا ب دەستڤە بینت پشتی د فینالێ دا ئەوا ل 15ێ نیسانا سالا 2025ێ شیابوو ل سەر ئەردێ یاریگەها خوە سەركەڤتنێ ل سەر یانەیا ئەلقادسیە یا كۆێتی بینت ب گۆلەكێ بێ بەرانبەر و ئێكەم ناسناڤێ كۆپا كەنداڤی بۆ خەزینەیا وەرزشا ئیراقێ و كوردستانێ ب دەستڤە بینت.
