پڕۆژەیێن رێكا گەلیێ زەنتا و تۆنێلا چیایێ پیرسی دێ هێنە بجهئینان
رەمەزان زەكەریا:
د سەردانەكا مەیدانی دا بۆ دەڤەرداریا ئاكرێ، د. عەلی تەتەر، پارێزگارێ دهۆكێ، دوهی 9/2/2029 د كۆنگرەكێ رۆژنامەڤانی دا چەندین پڕۆژە و پلانێن حكومەتێ بۆ دەڤەرێ ئاشكراكرن.
د. عەلی تەتەر، پارێزگارێ دهۆكێ د كۆنگرەكێ رۆژنامەڤانی دا ل ئاكرێ راگەهاند: د پلان دایە رێكا گەلیێ زەنتا بهێتە بەرفرەهكرن، دیسا پڕۆژەیێ ستراتیژی یێ تۆنێلا چیایێ پیرسی ژی د ناڤ بەرنامەیێ كارێ وان دایە و ب پشتراستی ڤە دێ هێنە بجهئینان.
سەبارەت ئاریشەیا ئاكنجیبوونێ، د. عەلی تەتەر گۆت: «ئاكرێ ئێكە ژ وان دەڤەرێن رووبەرێ پێدڤی بۆ بەلاڤكرنا ئەردی لێ هەی، دیسا هەتا نوكە نێزیكی پێنج هزار پارچەیێن ئەردی هاتینە بەلاڤكرن و هەژمارەكا وان ل ئاكرێ بوون، پرۆسەیا كوژاندن و تاپۆكرنا ئەردی ل باژێڕڤانیان بەردەوامە و هەر دەمێ رێكارێن یاسایی ب دووماهی بهێن، پارچەیێن ئەردی ل سەر وەلاتیان دێ هێنە بەلاڤكرن».
پارێزگاری خویا ژی كر كو د قوناغا بهێت دا گرنگیەكا زێدەتر ب دەڤەرێ دێ هێتەدان و هێزا ئەنجامدانا پڕۆژەیان دێ ل سەر ئاكرێ بیت بۆ وێ چەندێ باژێڕ پتر گەشەیێ بكەت.
ل دۆر بزاڤێن رەوشەنبیری ل دەڤەرا ئاكرێ پارێزگاری گۆت: «مە بەرهەڤیا خۆ دیاركریە بۆ دابینكرنا ئاڤاهیەكی بۆ بزاڤا رەوشەنبیری ل ئاكرێ، گرنگە لڤین و فەستیڤالێن رەوشەنبیری یێن بەردەوام هەبن».
ل دۆر پۆستێن ئیداری، د. عەلی تەتەر گۆت: «گوهۆڕینێن ئیداری بەردەوامن، بەلێ هندەك پۆست پێدڤی ب دەنگدانا جڤاتا پارێزگەهێ نە، نوكە نەمایە، ژ بەر هندێ ئەم چاڤەڕێی پێكئینانا كابینا دەهێ یا حكومەتا هەرێما كوردستانێ دكەین و هەتا وی دەمی هندەك پۆست ب وەكالەت دێ هێنە ب رێڤەبرن».
دیسا هەر دوهی 9/2/2026 د. عەلی تەتەر، پارێزگارێ دهۆكێ سەرا دەڤەرداریا شخان دا و د ڕۆنشتەكێ دا بەحسێ ڕەوشا گشتی یا دەڤەرداریا شێخان هاتە كرن.
پارێزگارێ دهۆكێ د كۆنگرەكێ ڕۆژنامەڤانی دا ل دۆر لەهیێن تاخێ مشەختی ل سەنتەرێ شێخان و كەمپێن دەورۆبەران و دەڤەرداریا ئاكرێ دیاركر كو ئیدارا پارێزگەهێ و ڕێڤەبەریێن پەیوەندیدار بۆ هەڤكاریا وان هاتینە ڕاسپاردن، دیسا ل دۆر پڕۆژێن خزمەتگوزاری یێن دەڤەرداریا شێخان پارێزگارێ دهۆكێ گۆت: «هەژمارەكا زۆرا پڕۆژەیان هاتینە بجهـئینان و هەژمارەكا پڕۆژەیێن گرنگ ژی د قووناغێن كاری دانە».
