هەرێما كوردستانێ جهەكێ ئارام و ناڤەندەكا بازرگانـی یە ل دەڤـەرێ
زنار تۆڤی:
سەرۆكێ دەستەیا وەبەرهێنانێ دیار كر، نوكە هەرێما كوردستانێ جهەكێ ئارام و ناڤەندەكا ڤەكریا بازرگانییە ل دەڤەرێ، هەروەسا پار قەبارەیێ وەبەرهێنانێ گەشەیەكا بەرچاڤ بخۆڤە دیتیە.
د كۆربەندێ ئابۆریێ سعوودیە و هەرێما كوردستانێ دا ل هەولێرێ، د. محەمەد شوكری، سەرۆكێ دەستەیا وەبەرهێنانێ گۆت: «د 20 سالێن بۆری دا چیرۆكا مە چیرۆكا خۆراگری و ئاڤاكرنێ بوویە، هەروەسا هەرێما كوردستانێ بوویە سەنتەرەكێ ڤەكری یێ بازرگانیێ و سەقامگیریێ، ب تنێ پار مە مۆلەت دایە پتر ژ 210 پڕۆژەیێن نوو یێن وەبەرهێنانێ و سەرمایێ وان پڕۆژەیان پتر ژ چار ملیار دۆلاران بوویە، ئەڤە مفا و گەشەكرنەكا راستەقینەیە بۆ هەرێما كوردستانێ«.
سەرۆكێ دەستەیا وەبەرهێنانێ داخواز ژ كۆمپانیێن سعوودی كر د كەرتێن پیشەسازی و چاندنێ و گەشتیاری دا ل هەرێما كوردستانێ كار بكەن و گۆت: «یاسایا وەبەرهێنانێ ل هەرێما كوردستانێ یەكسانیێ د ناڤبەرا وەبەرهێنەرێن ناڤخۆیی و بیانی دا دپارێزیت، دیسا كۆمپانیێن ناڤخۆیی و ژوورێن بازرگانی د بەرهەڤن بۆ هەماهەنگی و دروستكرنا پڕۆژەیێن هەڤپشك ل گەل وەبەرهێنەرێن سعوودی».
