ئێكەتیا نڤیسەرێن كورد هەردەم ل گەل هێلا شۆڕەشێ و بەڕژەوەندیێن بلندێن گەلێ كوردستانێ بوویە
مەكتەبا رێكخستا پارتی ل پارێزگەها دهۆكێ ب هەلكەفتا 56 سالیا دامەزراندنا ئێكەتییا نڤیسەرێن كورد پەیامەكا پیرۆزباهیێ بەلاڤكر و تێدا هاتیە: گەرمترین پیرۆزباهیان ل هەوە یێن هێژا و تەڤایا ئەندام و نڤیسەر و تۆڕەڤانێن كوردستانێ دكەین، هیڤیخوازین وەكو هەردەم ب وی پەرێ دلسۆزیێ د خزمەتا پەیڤا ڕەسەنا كوردی دا بن.
ئاشكرا ژی كریە، ئێكەتییا نڤیسەرێن كورد ژ دەمێ دامەزراندنا خۆ و هەتا نوكە وەكو ڕێكخراوەكا تێكۆشەر و ب هەلوەست، هەردەم ل گەل هێلا شۆڕەشێ و بەڕژەوەندیێن بلند یێن گەلێ كوردستانێ و د خزمەتا زمان و ئەدەبیات و رەوشەنبیری و كلتۆرێ كوردی دا بوویە.
دیسا د پەیاما مەكتەبا رێكخستنێ دا هاتیە: «د درێژاهیا ژییێ خۆ دا ناڤەندەكا قەلەمێن خودان هەلوەست بوویە و د وێ ڕێیێ دا ژی هەژمارەكا شەهیدان پێشكێشی نیشتمانی كریە، د ئەڤێ سالڤەگەڕا پڕ رامان دا ب شانازی ڤە یادا وان دكەین و ل ئاست بەرهەمێن تەڤایا نڤیسەرێن كورد ژی ڕێزێ دگرین، دیسا ب ڕێز و پێزانینڤە كاروانێ خەباتا پڕشەنگدارا ئێكەتییا نڤیسەرێن كورد و ڕۆلێ بلند یێ نڤیسەر و ڕەوشەنبیرێن مە یێن نیشتمانپەروەر د هەلسەنگینین، ئۆمێدەوارین هەر دەم سەركەفتی بن».
