عەلی حسێن: خولا ئەڤجارە دێ ڕاهێنەرێن هۆلان مفای ژێ وەرگرن
شاهۆ فەرید:
ب مەرەما ئابدێتكرنا پێزانیان و دووماهی پێشهاتەیێن یارییا لەشجوانیێ ژبۆ پێشكەڤتنا ئاستی، 140 ڕاهێنەرێن ڤێ یاریێ ل سەر ئاستێ كوڕان و كچان پشكداری د خولا ئاستێ بی و ئاستێ سی یا نێڤدەولەتی دا كرینە، ئەوا ژلایێ فدراسیۆنا لەشجوانییا پارێزگەهێ و هەڤكارییا لژنەیا ئۆلمپی تایێ دهۆكێ بۆ ماوەیێ سێ رۆژان یا بەردەوام بوو.
عەلی حسێن سەرۆكێ فدراسیۆنا ناڤهاتی بۆ رۆژنامەیا ئەڤرۆ گۆت: ژبەر گرنگییا ڤێ خولێ مە هەموو بزاڤكرینە ئەڤ خولە ب شێوەیەكێ ڕێكخستی و جودا بهێتە كرن، لەوما ژی باشترین وانەبێژێن ڤێ یاریێ هاتنە دەستنیشانكرن، گرنگییا ڤێ خولێ ژی ژبەر كۆمەكا ئەگەران ژ وانا، ئاستێ ڕاهێنەرێن مە یێ زانستی پێشكەڤتی تر بیت تایبەت ئەوێن دناڤا هۆلێن وەرزشی دا ڕاهێنانان دكەن، دیسان ژبەركو كۆمەكا ڕاهێنەران بێ باوەرنامە نە و ئەڤە ژی دبیتە دەلیڤەیەك بۆ وان باوەرنامێ وەربگرن و ئاستێ خوە ژی پێشبێخن و بشێن باشتر مفایی بگەهینە یاریزانێن خوە یێن هولان، هەروەسان ژبۆ ڕێكخستن و فەرمیكرنا كارێ وانە كو ب بشێن ب دروستی كارێ خوە بكەن.
ژلایەكێ دووڤە ناڤهاتی گۆت: ئەڤ خولە ل سەر چەند تەوەر و بابەتێن جودا هاتییە ڤەكرن، ژ وانا لایەنێ خوارنا یاریزانی، لایەنێ هنگاڤتنا، لایەنێ چارەسەریێ، لایەنێ زانستێن دەرۆنی، ئەڤ هەموو ژی بۆ وێ چەندێ یە كو ڕاهێنەر بشێن چەوا سەرەدەریێ دگەل یاریزانێ خوە كەت تایبەت ددەمێ هۆلێن ڕاهێنانا ڤە، هەموو وانە ژی ب شێوەیێ تیۆری و پراكتیكی دهێنە گۆتن، ل سەر ئاستێ ئافرەتان بتنێ تیۆری هەیە و وانەبێژێن مە خودان باوەرنامەیێن دكتورایێ و شارەزاهییەكا مەزن دڤێ یاریێ دا هەنە.
عەلی حسێنی گۆت: ئەوا ئەم پێ گەشبین تایبەتمەندیەكا باش یا دهێتە دان بۆ ڤێ یاریێ تایبەت ل هۆلێن وەرزشی ژلایێ وەرزشڤان و خەلەكێ سادەڤە بۆ مەرەمێن جودا، لەوما ژی هەبوونا ڤان خولان گەلەك گرنگە ژبۆ كارەكێ زانستی و ئەكادیمی بهێتە كرن و زێدەتر 150 هۆلێن وەرزشی هەنە ئەڤە ژی بەلگەیە بۆ پێشكەڤتنا ڤێ یاریێ.
