رێنوماییێن نوو بۆ پاراستنا سلامەتیا نەخۆشێن دلی ل دهۆكێ هاتنە دەرئێخستن
دهۆك، لەزگین جۆقی:
رێڤەبەرێ سەنتەرێ ئازادی یێ نشتەرگەری و نەخۆشیێن دلی ل پارێزگەها دهۆكێ راگەهاند، ئەڤ سالە رێنمایێن نوو بۆ پتر پاراستنا ساخلەمیا نەخۆشیێن دلی هاتینە دەرئێخستن.
د. علا سالم، رێڤەبەرێ سەنتەرێ ئازادی یێ نشتەرگەری و نەخۆشیێن دلی ل پارێزگەها دهۆكێ بۆ رۆژناما ئەڤرۆ دیاركر، ڕۆژانە ب تنێ ژ دەمژمێر 3 هەتا 4ی ئێڤاری دێ سەرەدان بۆ نەخۆشێن دلی هەبیت و گۆت: «دەمێ كەسوكارێن نەخۆشان بهێن ژی، ناڤێن وان دێ هێنە تۆماركرن و رێ ب كەسەكی ب تنێ دێ هێتەدان، بچیت نەخۆشی ببینیت، ئەم داخوازێ ژ خەلكێ خۆ دكەین، ل سەنتەرێ دلی نەكەنە قەرەبالغ و پێگیریێ ب بڕیارا قەدەغەكرنا سەرەدانان بۆ نەخۆشان بكەن».
گۆت ژی: «تشتێ گرنگ و تایبەتمەند ب نەخۆشێن دلی ڤە، ئەوە چێنابیت سەرەدان دڤەكری بن، چ دەمێ كەسوكارێن نەخۆشان بڤێت سەردانێ بكەن، ئەڤە نابیت بهێنە كرن چونكی كارتێكرن ل سەر رەوشا ساخلەمییا نەخۆشی هەیە بۆ پتر پاراستنا ساخلەمیا نەخۆشێن دلی مە رێنمایێن نوو دەرئێخستن».
