د دو روودانێن جودا دا ل ئاكرێ دو كەسان گیانێ خۆ ژ دەست دا
رەمەزان زەكەریا:
د دەمێ 24 دەمژمێرێن بۆری دا، ل سنۆرێ دەڤەرداریا ئاكرێ ژ ئەگەرێ دو روودانێن جودا پیرەمێرەك و زارۆكەكێ دو سالی گیانێ خۆ ژ دەست دا.
ل گوندێ گۆجارێ یێ سەر ب ناوچەداریا بجیلێ ڤە، زارۆكەكێ ب ناڤێ (عەلی حاجی محەمەد) كو ژییێ وی دو سال و حەفت هەیڤ بوون، دكەڤیتە د ناڤ گۆمەكا ئاڤێ دا.
پشتی كەسوكارێن وی پێ حەسیان، زارۆك ب بێهۆشی ژ ئاڤێ هاتە دەرئێخستن و گەهاندە نەخۆشخانەیا تەنگاڤیان ل ئاكرێ، ژ بەر گرانیا رەوشا وی و چوونا ئاڤێ د سیهێن وی دا، ل نەخۆشخانێ گیانێ خۆ ژ دەست دا.
د روودانەكا دی دا ل گوندێ چەمەسیل یێ سەر ب بجیلێ ڤە، وەلاتییەكێ 75 سالی ب ناڤێ (حسێن مستەفا عەلی)، ژ ئەگەرێ (بریسیێ) گیانێ خۆ ژ دەست دا.
تەرمێ هەردو قوربانیان بۆ نۆشدارییا داد هاتینە ڤەگوهاستن و پشتی تەمامبوونا رێكارێن یاسایی رادەستی كەسوكارێن وان هاتنە كرن.
