هەر كەسەكێ بهایێ كەلوپەلان گران بكەت دێ هێتە سزادان
هەولێر، قائید میرۆ:
رێڤەبەرێ گشتیێ بازرگانی دیاركر، ب درێژاهیا مەها رەمەزانێ تیمێن چاڤدێریا بازاڕی دێ ب شەڤ و رۆژ چاڤدێریا بازاڕی كەن و دبێژیت: هەر كەسەكێ بهایێ كەلوپەلان بلند بكەت دێ هێتە سزادان.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، ل مەها رەمەزانێ دێ لیژنەیێن چاڤدێریا بازڕگانی ل هەموو دەڤەرێن هەرێما كوردستانێ بەردەوام د ناڤا بازاڕی دا بن و چاڤدێریا رەوشا بازاڕی كەن و گۆت: «سالانە لیژنەیێن چاڤدێریا بازڕگانی د دەمێ مەها رەمەزانێ دا بەردەوام و ب شەڤ و رۆژ دچنە د ناڤا بازاڕی دا و چاڤدێریا بهایێ كەلوپەلان دكەن».
نەوزاد شیخ كامل گۆت ژی: «هەر ل دەستپێكا مەها رەمەزانا ئەڤ سالە ژی لیژنەیێن مە دێ دەست بكاربن و دووڤچوونا بهایێ كەلوپەلان د بازاڕی دا كەن، هەر بازڕگانەكێ دەستكاریا بهایێ كەلوپەلان بكەت، یان ژی كەلوپەلێن دەم ب سەرڤەچوویی بفرۆشیت، ل گورەی قانوون و رێنمایان دێ هێتە سزادان، چونكی مخابن هندەك كەس مەها رەمەزانێ ب دەلیڤە دزانن بۆ بلندكرنا بهایێ كەلوپەلان، یان ژی كەلوپەلێن دەم ب سەرڤەچوویی بفرۆشنە وەلاتیان، بەلێ تیمێن بازڕگانی دێ ب هووری چاڤدێریا بازاڕی كەن و كەسێن پێگیر نەبن دێ هێنە سزادان».
