ئـەرێ راسـتە دەمێ پـارە دئـاخڤیت هـەمی بێدەنـگ دبن؟
بـەدەل گـابێركـی
چەندین گۆتن ل دۆر پارەیی هاتینە گۆتن وەكی پارە هەموو تشتە یا پارە دكەت چ تشت نەشێن بكەن و دەمێ پارە دئاخڤیت هەمی هەڤكێشەیێن ئالۆز چارەسەر دكەت و دبێژن پارەیێ هاتیە دروستكرن بۆ هندێ خزمەتا مرۆڤان پێ بكەن، بەلێ نوكە ئەو گۆتن هاتیە گوهۆرین ب ڤی رەنگی ئەو ژی مرۆڤ نوكە خزمەتا پارەیی دكەت نەك بەس خزمەتێ هەتا یێ بوویە بەندەیەكێ باش بۆ پارەیی.
ئەرێ راستە ئەو پارەیە هەمی تشت ژێكرین ژن و مێر خووشك و برا باب و كور وەلات و هەتا دووماهیێ.
دبیت ژ نەزانینا مرۆڤان بۆ ژیانێ و قەبوولكرنا هەمی تشتان ل سەر خۆ یانژی ڤیانا مرۆڤان بۆ دنیایێ یا بێسنوور ببیتە ئەگەرێ هندێ كو ئەڤرۆ بهێتە گۆتن پارەیی ژیان هەموو یا كونترۆلكری دەمێ حەزێن تە بۆ كرینا تشتان ژ داهاتێ تە پتر لێهات ل وی دەمی دڤێت داهاتێ خۆ زێدە بكەی و هەكە ب دەست تە نەكەفت، دێ هەمی رێیان بكارئینی، بگرە مەلاقیان بۆ زەنگینان یان بەرپرسان و هەتا گەلەك ژن بووینە لەشفرۆش و گەلەك زەلام بووینە دەلالێن وان.
دەمێ پارە مرۆڤان كونترۆل دكەت ئەو ب خۆ نەپارەیە؛ بەلكو كەسەكێ تە كونترۆل دكەت خۆدان پارەیە و ل وی دەمی ئەو كەس و وژدانا خۆ بۆ هندێ كەرامەتاتە یا پاراستی بیت و نەكەڤیە د دەستێ چ مرۆڤان دا یا گرنگە حەزێن خۆ بۆ كرینا تشتان ل دویڤ بەریكا خۆ دابنی، هەكە نە هەر چ رەزیلا هەی دێ بینی و پاشی پەشیمانی فایدە ناكەت و چ تشت وەكی بەرێ ناڤرن.
ل دویڤ بۆچوونا بسپۆرێن ئابۆری سەرەدەریا دروست دگەل پارەیی ئەوە مرۆڤ هندەكێ ژ پارێ خۆ پاشكەفت بكەت بۆ هندێ ب وی پارەیی بشێی پرۆژەكی ڤەكەی هەكە ئەو پرۆژە چەندێ بچووك ژی بیت چ ئاریشە نینە ب تنێ هزرا خۆ بكە خەلك پێدڤی ب چ هەیە رۆژانە یانژی دێ شێی چ تشتی بكەیە ماركە د پاشەرۆژێ دا گەلەك كەس هەبووینە ب هزرەكا بچووك نوكە خۆدانێن ملیاران دۆلارانە.
چیرۆكا جاك مای گەلەكا سەرنج راكێشە و پتریا مرۆڤان یا گوهلێبووی ئەو كەسێ ژ هەژاریێ دەستپێكری و بوویە ملیاردێر ل جیهانێ جاك ما ل سالا 1964 ژ دایكبوویە ل وەلاتێ چینێ ل زارۆكینا خۆ گرنگیەكا مەزن دایە خواندنا زمانێ ئینگلیزیێ ب رێكا هەڤالەكێ خۆ فێری بكارئینانا ئەنترنێتێ بوو.
جاك ما تووشی چەندین شكەستنان بوو، ل دوماهیێ شیا كۆمپانیەكا مەزن بناڤێ ئەلی بابا دابنیت كو مەزنترین بارزگانی ب رێكا ئەنترنێتێ ئەڤ چەندە كارەكێ مەزن بوو د ژیانا ویدا و نوكە داهاتێ وی گەهشتییە 39 ملیاردۆلاران.
ل ڤێرە بۆ كۆمكرنا پارەكێ زێدە تە پێدڤی ب هزرەكا نوو و بەرهەكێ نوویە و رێكێن گەهاندنێ بۆ خەلكی و ژ بیرنەكە ئەو پارێن تو كوم دكەی گرنگە بزانی دێ چاوا پێ سەربلند و دلخۆش بی و چاوا دێ پێ رەزیل و بەخترەش بی هزرا خۆ بكە ئەڤە گرنگترین هاوكێشەیە بۆ هەركەسەكیژمە گەلەك مرۆڤ هەنە دێ بنە خودان پارە، بەلێ مخابن هەر زوو ژناڤ دچن و دەروونێ وان وژدانا وان دكەڤیتە ناڤ ئازاران دا.
هزرا خۆ بكە چەند كەسان نەفرەت ل خۆ كرینە ئەوا رۆژا پارە ب دەستكەفتی چەندا ژیانا خۆ ب تەمانی وێرانكری ب كێشانا مادێن بێهۆشكەر و چەندا تاوانكرینە و نوكە ل زیندانێدانە و چەندا ب ئێكجاری ژیانا خۆ بدوماهیك ئینایە.
پارە ئامرازەكێ دوسەرە هەكە بزانی بكاربینی، دێ تە دلخۆشكەت و هەكە نەزانی دێ دلنەخۆش بی و بێزار بی ژ ژیانێ، یا جوانە پیچەك ل سەر هندێ بكەی كا چاوا داهاتێ خۆ ب مەزێخم.
ل دویڤ گۆتنا چەندین بسپۆرێن جڤاكی هوسا دیاركرییە كو دلخۆشیا مرۆڤی یا دهندێدا مرۆڤ ببەخشیت ئانكو كەسەكێ دەستڤەكری د ژیانا خۆدا نەك مرۆڤەكێ قەلس بی چونكی ئەو بۆخۆژی دبیتە ئەگەرێ بێزاربوونێ.
یا دروست هەكە تو جارەكێ بشێی مرۆڤەكی دلخۆش بكەی ل وی دەمی خۆدێ سەدجارا دێ تە دلخۆش كەت بلا تە گومان ل سەر هندێ نەبیت چ جاران.
پاولۆكویلۆ دگۆتنەكا خۆدا دبێژیت:(( ئەوێ پارە ڤێ هەبن، چ جارا یێ بتنێ نینە)).
چ جارا هەبوونا پاران ئاریشە نینە هەكە بزانی ب دروستی بكار بینی و پێ خزمەتا مرۆڤان بكەی نەك هەلگری هەتا پشتا مرنا خۆ.
مرۆڤێن مەزن ئەون یێن دلەكێ نازك هەین و ئەقلەكێ مەزن هەردەم ب وی پارەیی یێ هەی بزاڤێ دكەن كو خێزانا خۆ دلخۆش بكەن و دەستێ هزاران كەسێن پێدڤی دگرن.
ب هزاران ملیۆنێر ل جیهانێ هەنە چیرۆكێن وان تژی قارەمانی نینە كو هەردەم ب پارەیێ خۆ پرۆژێن مەزن و هاریكاریێن مەزن دكەنە دیاری بۆ هەژاران.
ل دووماهیێ ئەم ژ بیرنەكەین كو پارە ئەو تشتە پتریا مرۆڤان نەشیاین خۆ ل بەربگرن و هەژاریا خۆ ژ بیكری و نوكە زۆلم و زۆرداریێ ل هەژاران دكەن.
(چ تشتان وەكی پارەیی مرۆڤ سەرشۆرنەكرینە)
ژیانا راست و دورست ئەوە كو تو پارەیی وەكو ئامرازەكی بۆ ئاسانكرنا ژیانا خۆ بكاربینی و ب شێی ب وی پارەیی هاریكارییا چەندین كەسان بكەین.
