میۆنشن؛ كوردستان ل سەرێ مێزێ یە
تاهر مووسا كۆچەر
د ناڤ جەرگێ ئالۆزیێن جوگرافیا سیاسی یا ڕۆژهەلاتا ناڤەڕاست و هەڤڕكیێن توند یێن جەمسەرێن جیهانی دا، پشكداریكرنا نێچیرڤان بارزانی، سەرۆكێ هەرێما كوردستانێ، د كۆنفرانسێ ئاسایشێ یێ میۆنشن ٢٠٢٦ دا، گوهۆڕینەكا ستراتیژی یا گرنگە د ئاستێ پەیوەندیێن دەرڤە دا. ئەڤ ئامادەبوونە نیشادانا ڕاستیەكا نوویا سیاسی یە كو دبێژیت: هەولێر نە تنێ چاڤدێرە، بەلكو كارەكتەرەكێ بڕیاردەر و خۆدان پێگەهە ل سەر مێزا ئاسایشا نێڤدەولەتی.
ل سەر ئاستێ لێكدانەڤە و شیكاریا ستراتیژی، ئەڤ كۆڕبەندە وەك لۆتكەیا بڕیارێن چارەنڤیسساز دهێتە نیاسین. پشكداریا هەرێمێ د ڤی ئاستێ بلند دا، پەیامەكا رۆن ددەتە هەمی لایەنان كو كوردستان وەك قەوارەیەكێ سیاسی یێ خودان كیان، شیایە زمانێ بەرژەوەندیێن جیهانی تێبگەهیت و خۆ وەك هەڤپەیمانەكێ باوەرپێكری یێ وڵاتێن زلهێز بچەسپینیت. ئەڤە دەرئەنجامێ دارشتنەكا كویرە كو سەرۆكێ هەرێمێ سەرپەرشتیا وێ دكەت؛ كو تێدا دیپلۆماسیەتا ژیرانە ب كار دئینیت بۆ پاراستنا دەستكەفتێن نەتەوەیی د ناڤبەرا بەرداشێ ململانێیێن دەڤەرێ دا.
ل سەر مێزێن دانوستاندنێ ل وڵاتێ ئەڵمانیا، سەرۆكایەتیا هەرێمێ كار ل سەر سێ تەوەرێن سەرەكی دكەت كو پاشەڕۆژا نیشتمانی پێ ڤە گرێدایە. لایەنێ ئێكێ، پاراستنا شەرعیەتا یاسایی و سیاسی یا هەرێمێ یە بەرامبەر گوهۆڕینێن ناڤخۆیی یێن ئیراقێ. لایەنێ دوویێ، گرێدانا ئاسایشا كوردستانێ یە ب ئاسایشا جیهانێ ڤە، ب تایبەت د بوارێن دابینكرنا وزێ و بەرەنگاربوونا مەترسیێن تیرۆرێ دا. لایەنێ سێیێ ژی، نیشادانا هەرێمێ یە وەك ناوەندەكا سەقامگیریێ كو دشێت ببیتە پردەكا گەنگەشەیێ د ناڤبەرا هێزێن جیهانی دا.
ئەو شێوازێ نێچیرڤان بارزانی د ناڤدەولەتیكرنا كێشەیێن هەرێمێ دا پەیڕەو دكەت، كو ل سەر بنەمایێ عەقڵانیەتا سیاسی هاتیە ئاڤاكرن، شیایە كوردستانێ ژ تەلەیا جەنگێن تەوەران دویر بێخیت. سەرۆكێ هەرێمێ چاڤەڕێ ناكەت مەترسی بگەهنە سنووران، بەلكو ئەو دناڤ جەرگێ كۆنفرانسان دا دچیتە د ناڤ كویراتیا هەڤكێشەیان دا داكو پێگەهێ هەرێمێ ب پارێزیت. ئەڤە ئەو دیتنا مەزنە كو نیشان ددەت دانوستاندن ب هێزترین چەكێ مەیە و هەرێما كوردستانێ ل سەرێ مێزا بڕیارێ یە، نەك ل پەراوێزا روودانان.
ب كورتی، پەیاما ڤێ پشكداریێ یا رۆهنە، بێی هەولێر چ هەڤوكێشەكا ئاسایشێ ل ناوچەیێ تەمام نابیت. وێنەیێن سەرۆكێ هەرێمێ دگەل سەركردێن جیهانێ، بەڵگەنە ل سەر سەركەفتنا بزاڤێن دیپلۆماسی یێن هەرێمێ د گەهاندنا دەنگێ گەلێ مە بۆ بلندترین سەكۆیێن بڕیاردانێ ل جیهانێ.
