پەرلەمانێ ئۆرۆپا داخوازا سیستەمەک نە ناڤەندی بۆ سووریێ دکەت
هژمارەک زێدە ژ ئەندامێن پەرلەمانێ ئۆرۆپا دیار دکەن، رەوشا سووریێ گەلەک ئالۆزە و هەروەسا کورد و نەتەوەیێن دی یێن ل سووریێ ژی هەست ب مەترسیێ دکەن، ژ بەر ڤێ یەکێ ژی دڤێت سیستەمێ نوو یێ سووریێ سیستەمەک نە ناڤەندی بیت.
پشکداریا هەر دو شاندێن کوردی یێن هەرێما کوردستانێ و رۆژئاڤایێ کوردستانێ د کۆنفرانسێ میونشنێ دا بوویە رۆژەڤا دەزگەهێن راگەهاندنا جیهانێ و ل ئالیێ دی ل پەرلەمانێ ئۆرۆپا ژی هژمارەک زێدە ژ ئەندامێن پەرلەمانی دیار دکەن، رەوشا نها یا سووریێ گەلەک خرابە، هەروەسا بزاڤێن بۆ ئاڤاکرنا سووریایەک نوو ژی بێی پشکداریا کوردان سەرکەفتی نابیت و دڤێت کورد و هەموو پێکهاتەیێن دی یێن ل سووریێ د سیستەمێ نوو دا پشکدار بن و گرنگە کار بۆ ئاڤاکرنا سووریایەک نوو بهێتە کرن کو نوونەراتیا هەموو پێکهاتەیێن ل سووریێ بکەت.
ئەڤین ئینجیر پەرلەمانتارا کورد راگەهاند کو ب زۆرێ کەس نەشێت سووریایەک ئێکگرتی ئاڤا بکەت، ل سووریێ تنێ ئێک نەتەوە ناژیت کو هەموو تشتەک ب دلێ وان بیت، ل سووریێ کورد، دورزی، عەلەوی و گەلەک پێکهاتەیێن دی هەنە، مخابن دەستهەلاتا ئەحمەد شەرعی ئەو نە پاراستن و ئێرشی وان ژی هاتە کرن، دڤێت وەلاتێن ئێکەتیا ئۆرۆپا ل هەمبەر زۆرداریا ل کوردان و نەتەوەیێن دی دهێتە کرن بێدەنگ نەمینن و گرنگە کار بۆ ئاڤاکرنا سووریایەک نە ناڤەندی بهێتە کرن، هەکە ئەو یەک نەهێتە کرن دێ رەوشا سووریێ گەلەک خراب بیت و گۆت: (ب بەلگە هاتیە سەلماندن کو گەلەک چەکدارێن سەر ب ئەحمەد شەرعی وەکو تیرۆرستێن داعشێ تاوانێن مەزن دەرحەق کوردان و عەلەویان ئەنجام داینە و دڤێت سنورەک بۆ وان بهێتە دانان، ڤێ دووماهیێ ژی مە دیت کا چاوا چەکدارێن توندرەو ئێرشی کوردان کرن و مخابن گەلەک وەلاتیێن سڤیل یێن کورد بوونە قوربانی و هەتا نها ژی باژیرێ کۆبانێ کو وەکو سیمبۆلا بەرخوەدانا ل دژی داعشێ دهێتە دیتن، ژ ئالیێ چەکدارێن توندرەو یێن سەر ب ئەحمەد شەرعی ڤە هاتیە دۆرپێچ کرن).
ل ئالیێ دی دۆبراڤکا شویجا ئەنداما پەرلەمانێ ئۆرۆپا ژی دیار کر، پێدڤیا سووریێ ب دستوورەک نوو و دیموکراتی هەیە کو تێدا مافێن گەلێ کورد و نەتەوەیێن دی گەرەنتی بکەت، مخابن نها تشتەک وەسا نینە و دەستهەلاتا بەروەخت یا شامێ ب پشتەڤانیا ئەمریکا و هندەک وەلاتێن دی بزاڤا ئاڤاکرنا سیستەمەک ناڤەندی دکەت، ئەو یەک ب چو رەنگەکێ ناهێتە قەبوول کرن، وەلاتێن ئێکەتیا ئۆرۆپا ل دژی ئاڤاکرنا سووریایەک وەسا نە، چونکی دیارە ئارمانجا شەرعی ژناڤبرنا هەموو پێکهاتەیێن دی یێن ل سووریێ یە، لێ پەرلەمانێ ئۆرۆپا پشتەڤانیێ ل مافێن کوردان و پێکهاتەیێن دی یێن ل سووریێ دکەت.
