پەیاما دویماهیێ
ئاشتی یونس
هێشتا ئەو ل قۆناغا ژیانا خۆ یا لاوینی و بێ گونەهییێ دا بوو؛ ژیان ژنوی وەکو گولەکێ ل پێش وی ڤەدبوو، رۆژ ب رۆژ جوانتر و گەشتر دبوو و دگەهشت. هێشتا ڕێیەکا درێژ ل پێش وی ڤە ما بوو، ڕێیەکا پڕ ژ هیڤی، خەون و ئارمانجێن ژیانێ ل بەندا وی بوو.
بتنێ ئەڤە چەند ڕۆژێن کێمن ژ مرنا بابێ وی؛ بابەکێ دلێر، ئەوێ ل سەنگەرێن بەرخودانێ دا، ل شەڕێ دژی دوژمن و نەیاراندا شەهید بووی. خەما وان هێشتا یا نوی بوو؛ ل سەر دلێ وان، و شینی و گری دناڤ مالباتێ دا یا گەرم بوو. جلكێن ڕەش هێشتا ل بەر وان بوون و ئەڤ ڕەنگە بۆ وانا نیشانا خەم و ماتەمینییێ بوو.
ژبەرکو دلسۆزی و ڤیانەکا بێ وێنە بۆ بابێ خۆ هەبوو؛ گەلەک پێڤە یێ گرێدابوو، دەما ئەڤ خەبەرێ جەرگ سۆتی بهیستی، تەڤ دنیایا وی ب ئێکجاری تێکچوو. توشی شۆکەکا گەلەك گران بوو؛ قەد نەشیا ب پەیڤیت، نەشیا بگریت، نەشیا بخویت و ڤەخویت، و نەشیا خۆ ڕابگریت. خۆ ژ هەر تشتێ بایکوت کر بوو، دەست ژ خۆ بەردا بوو. ژبەرکو ڤێ خەم و کۆڤانێ کارتێکرنەکا گەلەك مەزن ل سەر دەروون و لەشێ وی کرن، تاکو ب تەمامی ڕەوشا خۆیا سروشتی و نۆرمال ژدەست دای، مینا بەلگێن وەرزێ پاییزێ وەریا.
ل ماوەیەکێ کورتدا، ڕویدانەكا نەچاڤەڕێکری و دلتەزین هاتە پێش. ڕەوشا ساخلەمییا وی زێدەتر خراب بوو؛ دلێ وی و هەناسەیێن وی تێکچوون، ژیان مینا بارەکێ گەلەك گران ل سەر سینگێ وی کەفت.
دایکا وی، ب دلەکێ گەلەك سۆتیڤە و ب چاڤێن تژی رۆندكڤە، ل هنداڤ سەرێ وی یا روینشتی بوو. دەستێ وی گرت بوو، ب دەنگەکێ گری و دلسۆزڤە نارینك پێ گۆت:
ئاخ، لاوێ من، بۆچی تە ئەڤ هەموو خەم و کۆڤان ب سەرێ خۆ ئینان؟
تو دێ چەوا من بهێلیە بتنێ و بێ کەس؟
ما هێشتا نە زوویە بۆ تە… ئەڤ وەغەركرنه و ئەڤ ئازارە؟
خەما بابێ تە بەس نەبوو، ئەفجا یا تەژی بهێتە سەر؟
ئەگەر تو ژیانا خۆ ژدەست بدەی، ئەز دێ چەوا شێم پشتی هەوە ژیم و بۆرینم؟
ل داوییا ژیانا خۆ، ب گیانەکێ ماندی و ب دەنگەکێ گەلەك لاوازڤە، چاڤێن خۆ گرتن و گۆت:
دایکا من یا خۆشتڤی و گرانبها
ببۆرە ل من، تو بخودێ گەردەنا من ئازا بکە. مرنا بابێ من نە ب دەستێ من بوو؛ ئەو مینا کارەساتەکێ ل سەر دلێ من کەفت، و دلێ من پارچە کر.
هیڤی و خەونا منا مەزن ئەوە ئەز ژی وەکو بابێ خۆ، ل ڕێکا خودێ و بڤێ نەخۆشییێ لدەڤ خودێ شەهید بم.
هیڤیا من ئەوە ل دنیا یا دی، ئەم پێکڤە ل دیدارا بەهشتا خۆدێ شاد بین، و بێ خەم و بێ ئازار بژین.
هیڤی دارم، سەبر و هەدارا خۆ دگەل خوشك و برایێن من یێن ژ من بچووکتر بینه؛ ئەمانەتێ خودێ بن؛ مە ژلاڤایێن خۆ ژبیر نەکە، دەنگێ وی یێ دویماهیێ هێدی هێدی نزم بوو، هەناسەیێن وی کورت بوون، دناڤ وێ هەناسەیا گراندا، بتنێ پەیامەك و خەمەك ما بوو، پەیامەك ژ دلێ دویماهییێ دەرچوو و گۆت: گۆری تە بم، ئەڤە گیانێ من یێ ب سڤكی دەردکەڤیت و دچیت.
