داگرتنا غازێ بۆ ترومبێلێن سەرنشین تێدا ل زاخۆ هاتە قەدەغەكرن
زاخۆ، دلۆڤان هالۆ:
جەمال هەسن، ڕێڤەبەرێ بەڕەڤانیا باژێڕی ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ژ بۆ پاراستانا گیانێ وەلاتیێن زاخۆ، داگرتنا غازێ ژ لایێ تڕۆمبێلێن مەزن یێن ڕاكرنا سەرنشینان ڤە هاتە قەدەغەكرن، ئانكو پێدڤیە تڕۆمبێل بێی سەرنشین ژ غازێ بهێنە پركرن.
ڕێڤەبەرێ بەڕەڤانیا باژێڕی ل ئیدارەیا سەربخوە یا زاخۆ ئاماژە ب وێ چەندێ ژی كر كو بڕیارا قەدەغەكرنا ڤی كاری پشتی وێ چەندێ هات، هەژمارەكا وەلاتیێن زاخۆ گازندەیێن خوە گەهاندینە مە، كو ب ڤی كاری مەترسی ل سەر ژیانا وان و زاڕۆكێن وان هەیە، مە ژی وەكو ڕێڤەبەری ئەڤ چەندە ب ڕژدی وەرگرت و كرە بڕیار.
جەمال گۆت: «مە ڕێنومایێن تایبەت ب ڤی كاری ڤە پێشكێشی شۆفێر و كارمەندێن داگرتنا غازێ كرینە، كو ئێدی ئەڤ كارە نەهێتە دووبارە كرن، هەر كەسەكێ پێگریێ ب ڕێنومایان نەكەت دێ هێتە سزادان».
