كۆنگرەیێ میۆنشن دەرازینکەك بۆ پەیوەندییێن نێڤدەولەتی یێن هەرێما كوردستانێ
ئاشتی سالح
كۆنگرەیێ مێۆنشن ل ئەلمانیا ئێك ژ گرنگترین كۆمبوونێن سالانە یێن جیهانێ یە، كو سەركردە و بریاردەرێن سیاسی و ئابووری ژ سەرانسەری جیهانێ لێ كۆم دبن. ئەڤ كۆمبوونە بوویە دەلیڤەكا گرنگ بۆ سەرۆكێ هەرێما كوردستانێ، جەنابێ نێچیرڤان بارزانی، دا كو نوینەراتیا هەرێمێ ل سەر ئاستێ جیهانی بكەت.سالانە سەرۆك بارزانی دهێتە داخوازكرن دا كو پشكدارییا ڤی كۆنگرێی بكەت و ئەڤە بوویە نەریتەك. ئەڤ تشتە دبیتە جهێ شانازییێ ژ بەر كو ژ ناڤا هەمی سەرۆكێن هەرێمان و دەڤەرێن جیهانێ، سەرۆكێ هەرێما مە دهێتە داخوازكرن بۆ پشكداریكرنێ، ئەڤە ژی نیشانا گرنگیا هەرێما مە یە ل سەر ئاستێ جیهانی.
كۆنگرێ میۆنشن دەلیڤەكا زێڕینە بۆ دیتن و هەڤدیتنێن دوقۆلی ل گەل سەرۆك و سەركردەیێن وەلاتێن مەزن یێن جیهانێ. سەرۆك بارزانی دشێت ل وێرێ ل گەل گەلەك سەركردەیان ڕووب ڕوو ببینیت و گەنگەشەیا دۆزا كوردستانێ بكەت، بەرژەوەندییێن هەرێمێ پێشبێخیت، و پەیوەندییێن دیپلۆماسی یێن هەرێما كوردستانێ بهێزتر بكەت د ڤان كۆمبوونان دا، بەحسێ دانوستاندن و گوهۆڕینێن ئابووری یێن جیهانی دهێنەكرن. پرسێن وەك بازرگانی، وەبەرهێنان، ئابووریا جیهانی، قەیرانێن دارایی و ڕێكێن چارەسەركرنا وان دهێنە گەنگەشەكرن. ئەڤە دەلیڤەكا گرنگە بۆ سەرۆكێ هەرێمێ دا كو ببینیت كا جیهان بەرەڤ كیڤە دچیت و هەرێما كوردستانێ چاوا دشێت خۆ دگەل ڤان گوهۆڕینان بگونجینیت.
هەروەسا كۆنگرەیێ مێنشێنێ دەلیڤەیەكا گرنگە بۆ گرێبەستێن بازرگانی د ناڤبەرا وەلاتان دا. سەرۆكێ هەرێمێ دشێت ل گەل كۆمپانیێن مەزن و دەولەتێن خۆدان ئابووریێن ب هێز پەیوەندییان دروست بكەت و وەبەرهێنانێ بۆ هەرێمێ ڕاكێشیت. ئەڤە دێ بیتە ئەگەرێ پێشكەفتنا ئابووریا هەرێما كوردستانێ و پەیداكرنا دەرفەتێن كاری بۆ خەلكێ وێ د سەردەمەكی دا كو جیهان گەلەك ب لەز دگوهۆڕیت، بەشداربوونا سەرۆكێ هەرێمێ د ڤی كۆنگرێی دا گەلەك گرنگە. ئەڤ كۆمبوونە دەلیڤەیێ ددەتە هەرێما كوردستانێ دا كو دەنگێ خۆ بگەهینیتە گوهێ جیهانێ و نیشابدەت كو هەرێما مە بەشەكا گرنگە ژ سیاسەتا نێڤدەولەتی. هەروەسا، سەرۆكێ هەرێمێ دشێت ل وێرێ بەحسێ مەترسییێن تیرۆرێ، دۆزا ئاشتیێ، هەروەسا مەسەلا پەنابەران بكەت، و پشتەڤانیێ بۆ دۆزا كوردستانێ وەرگریت. بێگومان، دەنگێ هەرێمێ كۆمبوونێن دێ گەهیتە گوهێ هەمی جیهانێ، و ئەڤە دێ یارمەتیا پێشكەفتنا هەرێمێ ژ هەمی ئالیان دەت.
سەرۆكێ هەرێمێ گەلەك جاران د ڤی كۆنگرێی دا ئاخفتینێن گرنگ پێشكێش كرینە و هەر جار پەیامەكا ئاشتیێ و پێكڤەژیانێ بۆ جیهانێ هنارتیە. جەنابێ وی هەردەم هەول دایە دا كو وێنەیەكێ دروست و باش یێ هەرێما كوردستانێ نیشابدەت.
ئەڤ كۆنگرێ دەلیڤێ ددەتە هەرێما كوردستانێ دا كو خۆ وەك دەڤەرەكا ئارام ل ناڤا ڕۆژهەلاتا ناڤین دا بناسینیت، كو ب سالانە، پێشمەرگێن قارەمان ل دژی تیرۆرێ خەباتێ دكەن، و هەرێما كوردستانێ بوویە جهێ پەنابەرێن ژ هەمی نەتەوە و ئایینان.
بێگومان، كۆنگرێ مێنشێنێ ژبۆ سەرۆك نێچیرڤان بارزانی و هەرێما كوردستانێ دا دەلیڤەیەكا باش بوو كو ڕۆلێ خۆ یێ نێڤدەولەتی بهێزتر بێخن و پەیوەندییێن باش ل گەل وەلاتێن جیهانێ دروست بكەن. ب ڤی ئاوایی، ئەڤ كۆنگرە دبیتە دەروازەیەكا گرنگ بۆ دیپلۆماسیا هەرێما كوردستانێ ل سەر ئاستێ جیهانی.
