دیوارێن پالپشت ژبەر هڕیانا كەڤر و بەران یێن دهێنە دانان
سندس سالح سلێڤانەیی:
پشتی ل چەند بۆری بەرەكێ مەزن ل سەر رێكا دچیتە كێلیا شەدای هاتیە خار و كەفتیە سەرجادێ، بلەز تیمێن سەرۆكاتیا باژێرڤانیا دهۆكێ گەهشتە وی جهی و ئەڤە چەند رۆژن دیوارێن پالپشت بۆ وان كەڤر و بەران یێن دهێنە چێكرن ئەوێن مەترسیا كەفتن و هاتنە خارێ ل سەر هەین و بەرپرسێ راگەهاندنا سەرۆكاتیا باژێرڤانیا دهۆكێ ژی دبێژیت: ئەڤە كارە دێ یێ بەردەوام بیت هەتا ئەو هەموو بەرێن مەزن یان كەڤرێن مەترسی ل سەر هەین دهێنە دیواركرن، چنكو ئەم ب ئەركێ خۆ دزانین هەردەم سەروسامانێ خەلكێ خۆ ب پارێزین و ئەو بۆمە ژ هەر تشتەكی گرنگترن.
شێروان حەسەن، بەرپرسێ راگەهاندنا سەرۆكاتیا باژێرڤانیا دهۆكێ، بۆ رۆژنامەیا ئەڤرۆ گۆت: پشتی ل هەیا بۆری بەرەكێ مەزن ل سەر رێكا دچیتە كێلیا شەدای ل جادەیا گەلی هاتیە خار و گەهشتیە سەرجادێ، كو سوپاس بۆ خودێ چ زیان نەبوون، لەورا هەر ل وێ رۆژێ تیمەكێ سەرۆكایەتیا باژێرڤانیا دهۆكێ سەرەدانا وی جهی كرن و ڤەدیتەنك بۆ هاتە چێكرن و ب پشتەڤانیا بەرێز پارێزگەرێ دهۆكێ نوكە تیمەك ل وی جهی كاردكەت و هەر بەرەك یان كەڤرەكێ تیمێن مە دبینن كو مەترسیا هەرفینێ یان هڕیانێ یا ل سەرر هەی ئێكسەر دیوارەكێ پالپشت بۆ دهێتە دانان دا ژ مەترسیا كەفتنێ رزگار ببیت، بۆ زانین ئەو دیوار ب بەران و ب شێوەیەكێ سرۆشتی دهێنە چێكرن دا دیمەنێ سرۆشتێ وی چیای یان وی جهی تێك نەچیت و كار دێ یێ بەردەوام بیت هەتا ئەو بەر و كەڤرێن مەترسی ل سەر هەین هەموو دهێنە چێكرن.
