پەیڤدارێ وەزارەتا گەهاندنا هەرێمێ: بهایێ كارتێن ئینترنێتێ بلند نابیت
هەولێر، قائید میرۆ:
پەیڤدارێ وەزارەتا گەهاندنێ ل حوكمەتا هەرێما كوردستانێ ئاشكراكر، زێدەكرنا باجێ ژ لایێ حوكمەتا ئیراقێ ڤە وان كۆمپانیا ڤەناگریت یێن مۆهلەت ل هەرێما كوردستانێ وەرگرتی و دبێژیت: كۆمپانیێن د بیاڤێ ئینترنێتێ دا مۆهلەتا هەرێمێ هەی، بهایێ كارتێن وان بلند نابیت.
دیلان رەشاد، پەیڤدارێ وەزارەتا ڤەگوهاستن و گەهاندنێ بۆ رۆژناما ئەڤرۆ دیاركر، زێدەكرنا باجێ ژ لایێ حوكمەتا فیدرال وان كۆمپانیا ڤەناگریت یێن مۆهلەت ل حوكمەتا هەرێما كوردستانێ وەرگرتی و گۆت: «بەلێ هەر كۆمپانیەكا ل بەغدا مۆهلەت وەرگرتبیت دێ بهایێ كارتێن وان بلندبیت، هەژمارەكا كۆمپانیێن ئینترنێتێ هەنە ل هەرێما كوردستانێ زێدەكرنا باجێ وانا ناگریت و بهایێ كارتێن وان ناهێتە گرانكرن».
دیلان رەشاد گۆتژی: «كۆمپانیێن د بیاڤێ ئینرنێتێ دا ل گورەی بڕیار و رێنمایێن حوكمەتا هەرێما كوردستانێ كار دكەن و ئەگەر بهێت و بڕیارا زێدەكرنا باجێ وان كۆمپانیان ژی بگریت، كۆمپانی بخۆ دێ باجێ دەتە حوكمەتێ نەك بهایێ كارتێ گران بكەت، لەوڕا ژی ئەم وەلاتیان پشتڕاست دكەین بهایێ كارتێن وان كۆمپانیا گران نابیت یێن مۆهلەت ل حوكمەتا هەرێما كوردستانێ وەرگرتی، چونكی ل گورەی بڕیارا حوكمەتا ئێراقێ 20%ێ باج ل سەر كۆمپانیێن گەهاندنێ هاتیە زێدەكرن و ئەو پارە ژی دێ چیتە سەر كارتێن وان كۆمپانیان».
