وەلاتیێن 29 گوندێن دەڤەرا بەرێ گارێ خڕڤەبوونەك ئەنـجام دا و داخـوازی هەنە
هەژمارەكا ولاتیێن 29 گوندێن سنۆرێ دەڤەرا بەرێ گارێ یا سەر ب دەڤەردارییا ئامێدیێ ڤە خرڤەبووك ل نێزك گوندێ سەرگەلێ ئەنجام دا و رێیا سەرەكی یا د ناڤبەرا ئامێدیێ و دێرەلۆكێ گرت و داخواز دكەن رێیا گوندێن وان بهێتە ڤەكرن.
ئێك ژ وەلاتیێن پشكدار د ڤێ خرڤەبوونێ دا بناڤێ لەزگین بۆ ئەڤرۆ دیاركر، ئەو هاتینە ڤێرێ بۆ گەهاندنا گازندەیێن خوە بۆ حكومەتێ و دەزگەهێن پەیوەندیدار و گۆت: «مەرەما مە نە ئەوە رێكێ بگرین، داكو زیانێ بگەهینینە خەلكی یان ژی حكومەتێ، ب تنێ مە دڤێت گازیا مە بگەهیت، ژ بەر كو مە چو جهـ نەهێلاینە، ئەم نەچویینێ ژ حكومەتێ و حزبێ، هەروەسا ئاسایشێ ژی، لێ دیارە بێ مفا بوویە و ئەم داخواز دكەین رێیا گوندێن مە بهێتە ڤەكرن و مە چ دی ژ حكومەتێ نەڤێت».
عەباس ئێكە ژ وان كەسێن پشكداری د خرڤەبوونێ دا كری و كارێ وێ جۆتیاریە بۆ ئەڤرۆ گۆت: «نوكە وەختێ كەزاخێ و سەخبێركرنا دەرامەتێ چاندنێ یە، ژ بەر وێ یەكێ ئەم داخواز دكەین رێك ب مە بهێتەدان بچینە سەرگوندێن خوە، مە گەلەك بزاڤ كرینە رێكا گوندێن مە بهێتە ڤەكرن، لێ چو لایەنەكی بەرسڤەكا دروست نەدایە مە، ژ بەر وێ یەكێ ژی مە پەنا بریە بەر رێكگرتنێ، هیڤیدارین حكومەت ل دووڤ داخوازیا مە بهێت و رێكێن مە بهێنە ڤەكرن، داكو ئەڤ سالە ژی دەرامەتێ مە ب هەروە نەچیت».
