دێ دووماهیێ ب شەڕێ ٥٠ سالێن بۆری ل تورکیا ئینین
سەرۆکێ پەرلەمانێ تورکیا ل گەل کۆنسول و نوونەرێن چەندین وەلاتێن جیهانێ یین ل تورکیا کۆمبوو و سەبارەت ب قووناغا ئاشتیێ دیار کر، وەکو تورکیا وان دڤێت شەڕێ ٥٠ سالێن بۆری ل تورکیا ب دووماهی بهێت، نها کارێن گەلەک باش هاتینە کرن و رێکخستنا پەکەکێ ب فەرمی خوە هلوەشاند و شەڕ ژی راگرت، ل هەمبەر دا کار بۆ چاکسازیێن قانوونی و سیاسی ل تورکیا دهێنە کرن و گۆت: (وەکو کۆمسیۆنا ئاشتیێ و براتیێ مە گەلەک کۆمبوون کرن و هەروەسا شاندەکێ کۆمسیۆنا سەرەدانا ئیمرالیێ ژی کر و ل گەل سازی و رێکخستنێن جودا جودا یێن تورکیا ژی کۆمبوون هاتنە کرن، مە خواست ئەم نێرینا هەموو جڤاکێ تورکیا وەربگرین و وەسا بریارەکا دروست بدەین کو د بەرژەوەندیا هەموو تورکیا دا بیت، نها خەلکێ تورکیا هەموو پشتەڤانیێ ل راگرتنا شەڕی و قووناغا ئاشتیێ دکەن و ئەو یەک ژی گەلەک گرنگە).
نومان کورتولمیش ئەو یەک ژی دیار کر، نها کار بۆ قانوونێن نوو دهێتە کرن، دێ پەرلەمانێ تورکیا گەلەک قانوونێن نوو پەسەند کەت، راپۆرتا کۆمسیۆنێ دێ ل پەرلەمانی هێتە گەنگەشە کرن، ب گشتی نها تورکیا کەفتیە د قووناغەکا گرنگ دا مە وەکو تورکیا بریارا خوە دایە و دێ ب رێیا دانوستاندنان و ئاشتیێ هەموو پرسێن هەی چارەسەر کەین.
