ئەز یەکێ ئادار حەزینم
مەلا عەبدلرەحیم ئینانچ (بەهمووری)
ئەز یەکێ ئادار حەزینم دل کولم نایێ هەدار
هەردەما ل بیرا خوە تینم من نینە سەبر و قەرار
لەو ل سەر گۆرێ دخوینم ڕەحمەتا باری هەزار
چوویە ڕەحمەت شاهێ بەرزان ئەی مەلایێ نامیدار
فرقەتا سەیدا دکر وێران دلێ من ڕاهەژاند
مال و ملک وی تەڤ دە دێران پشتا کوردان تەڤ شکاند
ئەم کرین ئێسیر ل دێران دەولەتا من وەرگەڕاند
ڕێبەرێ سەرحەد و خەرزان ئەی مەلایێ نامیدار
نەهسەد و هەفتی نەهان دە من چرا دل، ڤەمری
محنەتا چوونێ گران بوو هەرکەسەک هەلناگری
هەروەکی یەعقووب ب حەسرەت دل ب فیغان و گری
بوونە ئێسیر مان ل کەنعان ئەی مەلایێ نامیدار
پەسن و ئەوسافێن تە بێژم ناتەوانم ئەز نەشێم
هەم نکارم خوەش ببێژم وەک نەسیم ئەز بەوەشێم
شەرحا دل هندی ڤەرێژم چەندی بێژم دبنە کێم
مام د پەسنێ وی بێ ئەزمان ئەی مەلایێ نامیدار
جەهدە و سەعیا تە دایی هەر دەر و قادێن وەلات
قەهرەمان و هەم مەلایی گەل تەکۆشین و خەبات
ڕەحمەت و لوتفا خودایی هەروەکی ڕۆژێ هەلات
ڕۆنی کر پێشی ل کوردان ئەی مەلایێ نامیدار
چوویە ڕەحمەت شاهێ مەردا بەردەوام بەرزان مەقام
بەهمووری گەل گول و وەردا سەد سەلام و ئحترام
سەر ڕوحێ سەیدا بخوەندا هدهدێ شێرین کەلام
مەرقەدا هون لێ درازان ئەی مەلایێ نامیدار
٠١/٠٣/٢٠٢٦ جزیر
