بۆ پێشوازیكرنێ ل جەژنا نەورۆزێ سەرێ گری ل ئاكرێ دهێتە بەرفرەهكرن
رەمەزان زەكەریا:
د چارچوڤێ بەرهەڤیێن بەردەوام دا بۆ پایتەختێ نەورۆزێ، سەرۆكاتیا باژێرڤانیا ئاكرێ ب بزاڤێن بەردەوام دەست ب نووژەنكرن و بەرفرەهكرنا جهێن گەشتیاری كریە، ب تایبەت سەرێ گری.
بلند رزا زبێر، سەرۆكێ باژێرڤانیا ئاكرێ بۆ ئەڤرۆ گۆت: «پڕۆژەیێ بەرفرەهكرنا سەرێ گری، پێدڤیە بەری هاتنا جەژنا نەورۆزێ هەموو كارێن وی ب دووماهی بهێن و بكەڤیتە د خزمەتا وەلاتیان دا».
ئاشكرا ژی كر، كار دهێتە كرن، جهێ سەرێ گری باش بهێتە بەرفرەهكرن، داكو جهێ میهڤان و گەشتیاران هەبیت و ئاستەنگێن قەرەبالغیێ كێم ببن، دیسا خزمەتەكا ژ هەژی بۆ وەلاتیێن دەڤەرێ و گەشتیارێن سەردانا ئاكرێ دكەن؛ بهێتە كرن و گۆت: «ئاكرێ وەكو پایتەختێ نەورۆزێن ئەركەكێ نەتەوەیی ل سەر ملایە، لەورا هەموو بزاڤ د خزمەتا وێ چەندێ دانە، كەرنەڤالا ئەڤ سالە ب جوانترین و رێكوپێكتریت شێوە بهێتە ئەنجامدان، ب جۆرەكی، كو د ئاستێ ناڤودەنگیا ئاكرێ و بیرەوەریا جەژنا نەتەوەیی یا نەورۆزێ دا بیت».
