دەڤەردارێ دهۆكێ: كاركرنا موەلیدەیان بۆ دەمێ 20 رۆژێن بهێـن هاتـە درێژكـرن
دهۆك، لەزگین جۆڤی:
ژبەر ڕەوشا نوكە و كێمبوونا دەمژمێرێن كارەبا نیشتیمانی و ب مەرما خزمەتكرنا وەلاتیان، بڕیار هاتیەدان موەلیدە ل دەڤەرداریا دهۆكێ ب شێویەكێ گشتی كار بكەن.
بریندار حەیدەر، دەڤەردارێ دهوكێ بۆ رۆژناما ئەڤرۆ دیار كر، وان ل گەل داخوازكاریا گشتی و لیژنا موەلیدان و كۆمەلا خودانێن موەلیدان ل دهۆكێ، بڕیار هاتەدان بەرنامێ كاركرنا موەلیدان ل سنۆرێ دەڤەرداریا دهۆكێ بۆ دەمێ 20 رۆژێن بهێن درێژ ببیت.
ناڤهاتی گۆت: «كاركرنا موەلیدان ژ دەمژمێر 5ی ئێڤاری هەتا دەمژمێر 6ی سپێدێ هەر دەمێ كارەبا نشتیمانی نەبیت، دیسا بهایێ هەر ئەمپێرەكی بۆ ڤان 20 ڕۆژان 12 هزار دینار هاتینە تەخمینكرن و دانا پارەی دێ ب شێوەیێ پێشوەخەت بیت».
گۆت ژی: «بەرنامێ كاركرنا موەلیدان بۆ ڕۆژێن جەژنێ و پشتی جەژنێ دێ یێ جودا بیت و هەر گوهۆڕینەكا نوو پەیدا ببیت، بەرنامێ كاركرنێ دێ هێتە گوهۆڕین».
