بەلاڤكرنا غازێ دێ بیتە ب كارت و هەر مالەك دێ دو بتلان وەرگریت

دهۆك، دلۆڤان ئاكرەیی:

بەرپرسەكێ پشكنینێ ل رێڤەبەریا نەفت و كانزایان ل حكومەتا هەرێما كوردستانێ دیاركر، د پلان دایە، د ڤێ حەفتیێ دا بەلاڤكرنا غازێ ببیتە ب «كارت»، داكو ب شێوەیەكێ ئێكسان ل سەر هەمی خەلكی بهێتە بەلاڤكرن و بهایێ وێ ژی بهێتە كۆنترۆلكرن و دبێژیت: د ڤێ رەوشا نوكە دا، پلانا مە ئەوە، هەر مالەك مەهانە دو بتلێن غازێ ب بهایێ هەشت هزار و 500 دیناران وەربگریت.
سالار محەمەد، بەرپرسێ پشكنینێ ل رێڤەبەریا نەفت و كانزایان ل حكومەتا هەرێما كوردستانێ بۆ رۆژنامەیا ئەڤرۆ گۆت: «ل دهۆك و سلێمانیێ ژی ب هەمان شێوەیێ هەولێرێ بهایێ غازێ گران بوویە، ئەگەر د دو رۆژێن بهێن دا كۆمپانیا «دانەغاز» دەست ب كارێن خوە بكەتە ڤە، ئەڤ ئاریشە دێ وەكی یا كارەبێ چارەسەر بیت؛ چونكی غازا مالان و ترۆمبێلان، ب تنێ ل كێلگەها كۆرمۆر دهێتە بەرهەمئینان، ژ بەر كو غازا كێلگەها كۆرمۆر غازەكا پاقژ و بێ ئاریشەیە».

کۆمێنتا تە