ب فەرمانا مەسرور بارزانی كەرنەڤالا نەورۆزێ ل ئاكرێ بەرفرەهتر دێ هێتە ئەنجامـدان
رەمەزان زەكەریا:
مەسرور بارزانی، سەرۆكێ حكومەتا هەرێما كوردستانێ، گرنگیەكا تایبەت و باش ب بیرەوەریا نەورۆزێ ل ئاكرێ ددەت و بڕیارە ئەڤ سالە ب رەنگەكێ فەرمی و گەلەك بەرفرەهتر ژ سالێن بۆری بڕێڤە بچیت.
ئەمین سەلیم، ڕێڤەبەرێ گەشتوگوزارا ئاكرێ بۆ ئەڤرۆ گۆت: «پشتی ب فەرمانا مەسرور بارزانی، سەرۆكێ حكومەتا هەرێما كوردستانێ، ئاكرێ وەكو پایتەختێ نەورۆزێ هاتیە نیاسین، نوكە گرنگیەكا زۆر ب ژێرخانا گەشتیاریا باژێڕی دهێتە دان، جهێ سەرەكیێ بیرەوەریێ ل سەرێ گری جوانكاری و بەرفرەهكرن بۆ دهێتە كرن، خزمەتگوزاریێن پتر بۆ دهێنە دابینكرن».
ناڤبری گۆت ژی: «ئەڤ سالە بیرەوەری دێ جودا بیت، ژ بەركو ناكەڤیتە د ناڤ مەها ڕەمەزانێ دا و دێ هەڤدەم بیت ل گەل جەژنا ڕەمەزانێ، پار سەرەڕای مەها ڕەمەزانێ 88 هزار گەشتیار بۆ نەورۆزێ هاتبوونە ئاكرێ، بەلێ بۆ ئەڤ سالە چاڤەڕێی هاتنا هەژمارەكا زۆر یا گەشتیاران ژ هەموو وەلاتان دكەین، دیسا مە پڕۆژەیەك پێشكێشی حكومەتێ كریە، داكو بیرەوەریا نەورۆزێ ل ئاكرێ ژ ئێك رۆژ ببیتە كەرنەڤالەكا ئێك حەفتی، داكو چالاكیێن جۆراوجۆر تێدا بهێنە ئەنجامدان و سەرنجا گەشتیارێن نێڤدەولەتی پتر ڕابكێشین».
