دڤـێت کـوردێن رۆژهـەلاتـێ ببنە پشکـەک ژ گـوهـۆڕینێن ل ئیرانـێ
بسپۆرەکێ کاروبارێن رۆژهەلاتا ناڤین دیار دکەت، ئەمریکا و ئسرائیل هەتا نەگەهنە ئەنجامەکێ باش شەڕی نادەنە راگرتن و ژ بۆ کو بشێن ئیرانێ ژی تەنگاڤ بکەن پێدڤیا وان ب هێزەکا ئەردی هەیە و کوردێن رۆژهەلات دشێن ببنە پشکەک ژ گوهۆڕینێن نها ل ئیرانێ.
جەنگ ساغنچ بسپۆرێ کاروبارێن رۆژهەلاتا ناڤین دیار دکەت، شەڕێ ئەمریکا و ئسرائیلێ ل گەل ئیرانێ ب دژواری بەردەوام دکەت و ئەمریکا و ئسرائیلێ شیاینە تا رادەیەکێ باش ئیرانێ تەنگاڤ بکەن، لێ مخابن تشتێ هەتا نها دیار دبیت هەر دو وەلاتان ژی چو بەرنامەیەک بۆ پاشەرۆژا ئیرانێ نینن، ئسرائیل و ئەمریکا دخوازن رژێما نها یا ئیرانێ لاواز بکەن و هەکە بشێن ژناڤ ببەن، لێ ل هەمبەر دا ئیران ژی ب هەموو شیانێن خوە شەڕی دکەت، چونکی مەلایێن ئیرانێ باش دزانن هەکە رژێم ژناڤ بچیت دێ تووشی چارەنڤیسەک گەلەک خراب بن و خەلکێ ئیرانێ ژ وان نابۆریت.
ناڤهاتی ئەو یەک ژی دیار کر، مخابن نها ل ئیرانێ ئۆپۆزسیۆنەک بهێز نینە کو بشێت ببیتە بەدیلێ دەستهەلاتێ، لێ هەکە شەڕ بەردەوام بیت هێزێن ئۆپۆزسیۆنێ دشێن ئێکگرتنا خوە راگەهینن، هەروەسا ئەمریکا و ئسرائیل ناخوازن بێی ئەنجامەک مەزن شەڕی بدەنە راگرتن و ل ئالیێ دی وەلاتێن کەنداڤی ژی دخوازن ئیران گەلەک لاواز ببیت دا کو جارەکا دی نەبیتە گەف بۆ وان و گۆت: (ئەمریکا و ئسرائیل دێ ئێرشێن خوە ل سەر ئیرانێ دژوارتر لێ کەن، چونکی نها شەڕ گەهشتیە قووناغەک هەستیار و هەکە ئەمریکا و ئسرائیل بێی ئەنجام شەڕی ب دووماهی بینن ئەو یەک شکەستنەکا مەزنە بۆ وان و دێ بیتە ئەگەرێ بهێزبوونا ئیرانێ، بێگومان دەمێ ئیران بهێز کەڤیت دێ مەترسی ل سەر وەلاتێن عەرەبی دروست بیت و ژ بەر ڤێ یەکێ ژی گەلەک زەحمەتە ئەمریکا و ئسرائیل د رەوشا نها یا هەستیار دا شەڕی بدەنە راگرتن).
سەبارەت ب رۆلێ کوردان ژی بسپۆرێ کاروبارێن رۆژهەلاتا ناڤین دیار کر، کوردێن رۆژهەلاتێ کوردستانێ شیان هەڤپەیمانیەکێ دروست بکەن، لێ هێشتا ژی لاوازن، هەکە شەڕ دەمدرێژ بیت بێگومان دێ پێدڤیا ئەمریکا و ئسرائیلێ ب کوردێن رۆژهەلات هەبیت، چونکی بەردەوامیا شەڕی دێ وەسا کەت ئسرائیل و ئەمریکا پشتەڤانیێ ل هێزێن کوردی بکەن و وی دەمی کورد دشێن رۆلەک سەرەکی و گرنگ بۆ پاشەرۆژا ئیرانێ بگێرن و گۆت: (لێ هەر چاوا بیت ئیران نها گەلەک لاواز بوویە، ئیرانا جاران نەما، هەکە شەڕ بهێتە راگرتن ژی ئیران نەشێت وەکو جاران ببیتە هێزەکا مەزن و کاریگەر ل رۆژهەلاتا ناڤین، ژ بەر ڤێ یەکێ ژی هەکە کوردێن رۆژهەلاتێ کوردستانێ بشێن سیاسەتەکا باش برێڤە ببەن دێ شێن بنە پشکەک ژ گوهۆڕینێن ل ئیرانێ).
