دەڤەرداریا بەردەڕەشـێ بوویە جەمسەرەكـێ گرنگ یێ ئاسایشا خوارنێ ل كوردستانێ
دهۆك، دلۆڤان ئاكرەیی:
ڕێڤەبەرێ چاندنێ ل دەڤەرداریا بەردەڕەشێ دیاركر، ل بەردەڕەشێ شۆڕەشەكا مەزن د بەرهەمئینانا پتاتێ دا پەیدا بوویە و سالانە بەرهەم زێدە دبیت، ئەڤە ژی بوو زاخییا ئاخێ و پەیداكرنا بازاڕی ژ لایێ حوكمەتا هەرێما كوردستانێ ڤە بۆ بەرهەمێ پتاتێ دزڤڕیت.
ئەندازیار تەحسین گۆران، ڕێڤەبەرێ چاندنا دەڤەرداریا بەردەڕەشێ بۆ رۆژنامەیا ئەڤرۆ گۆت: «سالانە نێزیكی 80 هزار تەنێن گەنمی ل دەڤەرێ دهێنە بەرهەمئینان و حكومەت ب دابینكرنا تۆڤ و دەرمانان پشتەڤانیا جۆتیاران دكەت، پتر ژ 80 پڕۆژەیێن پەلەوەران و چەندین پڕۆژەیێن بەرهەمئینانا هێك، چێلێن شیری ل دەڤەرێ هەنە، كو بووینە ژێدەرەكێ سەرەكی یێ گۆشتێ سپی و شیرەمەنیێ و زێدەباری گەنم و پتاتێ، بەرهەمێن وەكو: پێڤاز، گەنمشامی و شوتی ب رێژەیەكا زۆر دهێنە چاندن و حكومەتا هەرێمێ ب بەردەوامی پشتەڤانیا جۆتیاران دكەت، ب تایبەت د بیاڤێ ساخكرنا بەرهەمێن وان دا و دیتنا بازاڕێن گونجای بۆ بەرهەمێن جۆتیاران».
