چەندین بازرگان ژبەر گرانكرنا بهایان هاتینە سـزادان
هەولێر، قائید میرۆ:
رێڤەبەرێ گشتیێ بازرگانی ل هەرێما كوردستانێ ئاشكرا كر، ب تنێ ل مەها رەمەزانێ پێنج هزار سەرەدان بۆ ناڤا بازاڕی هاتینە ئەنجامدان و دبێژیت: هاتنا كەلوپەلان یا بەردەوامە و چەندین بازرگان ژی ژبەر گرانكرنا بهایێ كەلوپەلان هاتینە سزادان.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، هەر ل دەستپێكا مەها رەمەزانێ لیژنەیێن چاڤدێریا بازاڕی هاتینە زێدەكرن و ب تنێ ل مەها رەمەزانێ ئەو شیاینە پێنج هزار سەرەدانان ئەنجامبدەن و گۆت: «ئەم شیاینە 67 تەنێن كەلوپەلێن دەم ب سەرڤەچوویی ژناڤ ببەین، هەروەسا ب گوژمێ 20 ملیۆن دیناران جهێن بازرگانی هاتینە سزادان و 20 جهێن دی ژی ژ ئەگەرێ نە پێگیریێ هاتینە سزادان، ب چو شێوەیەكی رێكێ نادەین بازرگان مەها رەمەزانێ و رەوشا نوكە ب دەلیڤە بزانن بۆ بلندكرنا بهایێ كەلوپەلان».
نەوزاد شێخ كامل گۆت ژی: «چو مەترسی ل سەر نەمانا كەلوپەلان د ناڤا بازاڕێن هەرێما كوردستانێ دا نینن، دیسا هاتنا كەلوپەلان بۆ ناڤا هەرێما كوردستانێ یا بەردەوامە، بەلێ رەنگە بلندبوونا بهایێ دۆلاری یان زێدەكرنا باجا گومركی ژ لایێ ئیراقێ ڤە كاریگەری ل سەر بلندبوونا بهایێ هندەك كەلوپەلان هەبیت».
