مەترسیێن سونەتکرنا زارۆیان د حەفتیا ئێکێ دا

ل دۆر دیاردەیا سۆنەتکرنا زارۆیان د حەفتیا ئێکێ یا ژدایکبوونێ دا، تایبەتمەندەکێ نەخۆشیێن زارۆیان ل پارێزگەها دهۆکێ هۆشداریێ ددەتە دایک و بابان کو ئەڤ کارە ژ لایێ زانستی ڤە یێ شاشە و دبیتە ئەگەرێ هندەک ئارێشەیێن ساخلەمیێ یێن کو د پاشەرۆژێ دا دەردکەڤن.
​د. سەردار غازی پێدەیی، تایبەتمەندێ نەخۆشیێن زارۆیان ئاشکەرا کر کو گەلەک خەلک هزر دکەن سۆنەتکرنا زوو دێ ئازارا زارۆی کێم کەت یان ژی دێ زەرکا وی چارەسەر کەت. د. سەردار تەئکید کر کو: “چ پەیوەندی د ناڤبەرا سۆنەتکرنێ و نەمانا زەرکێ دا نینە؛ ئەوا دبێژن زەرک ب سۆنەتکرنێ دێ چیت، باوەریەکا شاشە و زەرک ب خۆ دێ هەر چیت یان دێ هێتە چارەسەرکرن ب بێ سۆنەتکرن.”
د. سەردار ئاماژە ب هندێ دا کو گەلەک حالەتێن زارۆیان دبینن کو د ژیێ (4-5) سالیێ دا گازندەیا ئێشانا زکێ خۆ دکەن. پشتی پشکنینێ دیار دبیت کو ژبەر سۆنەتکرنا وان د حەفتیا ئێکێ دا، کونا میزێ یا وان گەلەک یا تەنگ بووی، ئەڤ چەندە ژی دبیتە ئەگەر کو میز ب هێز و ب ئاراستەیەکێ نە ڕاست بڕیژیت، کو دبیتە ئەگەرێ ئێشان و فشارێ بۆ زارۆی ناڤبری دیار کر کو مانا حەفازێ بۆ دەمەکێ درێژ ل سەر زارۆیێ سۆنەتکری، فشارێ دئێخیتە سەر سەرێ ئەندامێ نێرینە و دبیتە ئەگەرێ هەودان و تەنگبوونا کونا میزێ. وی ئامۆژگاری دا کو: ​پێدڤیە زارۆ بۆ دەمەکێ کێم ب بێ حەفازە بمینیت دا فشار ل سەر لەشی کێم ببیتی.
​دایک پێدڤیە زارۆیێن خۆ زوو فێری دەستئاڤێ بکەن و نەهێلن هەتا ژیێ 3 یان 4 سالیێ هەر ب حەفازە بن.
​بۆ پاراستنا زارۆیان ژ ئاریشەیێن ساخلەمیێ د پاشەرۆژێ دا، د. سەردار غازی پێشنیار دکەت کو:
​“باشترە سۆنەتکرن بکەڤیتە پشتی سێ هەیڤیا ژیێ زارۆی، دا کو تووشی ئاریشەیێن تەنگبوونا بۆریێن میزێ و هەودانێ نەبیت.”
​هەروەسا ئامۆژگاری دا کو جل و بەرگێن تەنگ بۆ زارۆیان نەهێنە بکارئینان، چونکو کارتێکرنا نەرێنی ل سەر ساخلەمیا وان دکەت.

کۆمێنتا تە