رێیا سێ گوندێن دەڤەرا ئامێدیێ هاتە بڕین و ئاڤا ڤەخوارنێ نەمایە
ئامێدیێ ، مەحمود نهێلی
ژ ئەنجامێ بارینا بارانێن زۆر و رابوونا لەهیان و بلند بوونا ئاستێ ئاڤا ڕووباران تایبەت رووبارێ سپنە دو پر ل دەڤەرا ئامێدیێ بن ئاڤ بوون و زیان گەهشتینێ و رێیا سەرەكی یا سێ گوندان ل وێ دەڤەرێ هاتە بڕین و هەروەسا ئاڤا سێ گوندێن ناوچەدارییا دێرەلۆك قوت بوویە.
وەلاتی جەبار حەمید ئاكنجیێ ناوچەدارییا دێرەلۆك بۆ رۆژناما ئەڤرۆ دیار كر، ژ ئەنجامێ بلندن بوونا ئاستێ رووبارێ زێ و رووبارێ سپنە ل دێرەلۆكێ پرا گوندێ گەلەكا بن ئاڤ بوو و رێیا سەرەكی یا گوندێن گەلەكا و مەهیدێ و رێیا گۆڕستانا دێرەلۆك هاتە بڕین، هەروەسا هەردو لایێن پرێ ئاڤێ برینە و زیان گەهشتینە پرێ گۆت: ل پیرۆزانا ژی پرا سپنەی بن ئاڤ بوو و ئەنجامێ دا رێیا سەرەكی یا گوندی هاتە گرتن و وەلاتی ل هەردوو لایان ئاسێ مان.
سەقاناسیا ئامێدیێ دیار كر، پترین رێژا بارانێن ئەڤ سالە ل دێرەلۆكێ بارینە، بارانێن ئەڤ سالە گەهشتیە پتر ژ 1600 ملیمان.
ئێك ژ ئاكنجیێن گوندێ گەلەكا بناڤێ رەشید گەلەكی دیاركر، ئەڤ بارانێن زۆر یێن بەری چەند رۆژان باری بوویە ئەگەرێ هریانا ئەردی ل گەلەك جهان و بلند بوونا ئاستێ ئاڤا رووبارێ شێرانكی ، ژ بەر وێ یەكێ ژی بوریا ئاڤا ڤەخوارنێ یا كو ل گەلیێ شێرانە دهێت و ئاڤا ڤەخوارنێ بۆ گوندێن گەلەكا و مەهیدێ و هاریكا دابین دكەت ژ چەندین جهان شكەستیە و ژناڤچویە و ئاڤ ناگەهیتە وەلاتیان.
بەرپرسەكێ سەخبێریا ئاڤێ ل دەڤەرێ دیار كر، ئەوان ئاگەهـ ژ وێ ئاریشێ هەیە و ل گەل لایەنێن ئەولەهی دان و ستاندن كرینە و دێ ل دەمەكێ نێزیك تیمێن وان قەستا وی جهی كەن كو دكەڤیتە ناڤا كەلیێ شێرانە و دێ وێ ئاریشێ چارەسەر كەن و دێ ئاڤێ بۆ ڤان سێ گوندان دابین كەن. هەر ژ بەر ئەگەرێ بارینا بارانێن زۆر زیان ب چەندین جهێن گەشتیاری ل سنوورێ دەڤەرا ئامێدیێ گەهشتیە.
