چاڤدێریا بازرگانی ل زاخۆ: چەندین جهـ ژ بەر داشكاندنێن سەختە هاتینە دائێخستن
زاخۆ، دلۆڤان هالۆ:
كۆڤان ئاڤدەل، ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو دڤێت داشكاندن د بەرژەوەندیا خەلكی دا بن، نەكو داشكاندن بۆ خاپاندنا خەلكی بن.
ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ، ئاماژە ب وێ چەندێ ژی كر كو بێی ئاگەهداریا ڕێڤەبەریا چاڤدێریا بازرگانی نابیت داشكاندن بهێنە دانان و گۆت: «دڤێت بەری داشكاندنێ ب دەهـ ڕۆژان داخوازا داشكاندنێ ژ ڕێڤەبەریا مە بهێتە كرن، كا دێ داشكاندن چەند ژ سەدێ بیت و دێ بۆ كیژ پێدڤی و كەلوپەلان بیت».
گۆت ژی: «چەندین جهـ ژ ئەگەرێ داشكاندنا نە دورست و خاپاندنێ هاتینە دائێخستن، هندەك جهـ ژی هاتینە سزادان، لەوڕا ئەم ڕێكێ ب چو بازرگانان نادەین، سەرپێچیێ د دەرهەقێ وەلاتیان دا بكەن، چونكی ئەم پارێزڤانێن وەلاتیێن خوەینە».
