ئـەرێ شـەڕ ب دووماهی هات یـان فێلەكـا دی یە؟
قـەدری شـێرۆ
د جیهانا سیاسەتا نێڤدەولەتی دا، پەیڤا دووماهی هەردەم ب رامانا راوەستیانێ ناهێت، بەلكو پتریا جاران ب رامانا گوهۆڕینا سەنگەران دهێت. دگەل زڤڕینا دۆنالد ترامپی بۆ سەر تەختێ دەستهەلاتا جیهانی، پرسیارەكا گەلەك گرنگ پەیدا دبیت. ئەرێ پەیمانێن ب دووماهی ئینانا شەڕان راستی نە و مەرەم پێ ئاشتی یە، یان ژی تنێ بێدەنگییا بەری باهۆزێ یە دا كو تەختێ شانۆیێ بۆ كریارەكا سەربازی یا مەزنتر و هویربینتر ئامادە بكەت؟
د دەمەكێ دا كو رێبازا ترامپی یا دیارە ئەوژی ئاشتی ب رێكا هێزێ. بۆ تێگەهشتنا، كا ئەرێ ترامپ یێ راستگۆیە یا نە، دڤێت ئەم ڤەگەڕیێن بۆ رهو ریشالێن فەلسەفا وی یا سیاسی. ترامپ نە ژبەر هندێ حەز ژ شەڕی ناكەت چونكی كارەكێ نە رەوشتی یە، بەلكو ژبەر هندێ حەز ژێ ناكەت چونكی زەرەكا ئابوری یه، ئەو دبینیت كو ژێدەر و سامانێن ئەمریكا ژ ناڤدبەت. چونكی شێوازێ هزركرنا وی وەك بازرگانەكی یە، ترامپ هۆسا دبینیت كو شەڕێن كلاسیكی یێن درێژخایەن مەزاختنەكا دارایی یا بێ مفایە. ب دووماهی ئینانا شەڕێ كلاسیكی ب رامانا ب دووماهی هاتنا دوژمنكاریێ ناهێت، بەلكو رەنگە ب رامانا گوهۆڕینا بۆمبەیان ب سزایێن ئابووری یێن كوژەك یان ژی كریارێن سەربازی یێن بلەز هویربین وداوەشاندنا دربێن ئێكلاكەر. یان ژی بكارئینانا هێزەكا ناڤخۆیی وەكو ئازراندنا ئوپزسیۆنێ، دا ئەو ب رۆلێ تەماشەڤانی رابیت.
سیناریۆیێ دویێ: درەوا مەزن و سڕكرنا سیاسی
ئەو پێشبینییا دبێژیت راگەهاندنا ب دووماهی هاتنا شەڕی تنێ پەردەیەكە بۆ كریارەكا سەربازی یا ل بەرە كو برێكا هشكاتیێ بهێتە ئەنجامدان، پشتبەستنێ ب دیرۆكەكا درێژ یا خاپاندنا سەربازی دكەت. ڤەكێشان ژكێشەكا مەزن و بیاڤەكێ بەرفرەه و دیاریكری وەكو (ئۆكرانیا یان رۆژهەلاتا ناڤین) رەنگە تنێ رێكەك بیت بۆ پاشكەفتكرنا بودجە و شیانێن سەربازی دا كو ل سەر دوژمنەكێ دی چڕ بكەن، كو رەنگە ئێران بیت یان ژی بۆ گرتنا پێشیا چینێ بیت. ترامپ گەلەك گرنگیێ ددەتە كەفتنا ژ نیشكەڤە، ب رێكا بانگەشەیا ئاشتیێ، ئەو نەیارێن خۆ دكەتە د حالەتەكێ سستی و تەناهیێ دا، و ئەڤە ژی دبیتە ئەگەر هەر كریارەكا بلەز یا ل پاشەرۆژێ، كوژەكتر و كاریگەرتربیت.
سیناریۆیێ سێیێ: شەڕێ ئابووری، ئەوێ ب دووماهی نەهێت.
شاشی یە ئەگەر ئەم هزر بكەین شەڕ تنێ ب راوەستاندنا تەقەیێ ب دووماهی دهێت. د فەرهەنگا ترامپی دا، رەنگە شەڕێ سەربازی ب دووماهی بهێت دا كو شەڕێ گومرك و باجان دەستپێ بكەت. ئەگەر ترامپ پشتەڤانییا سەربازی ل دەڤەرەكێ راوەستاند، رەنگە ئەڤە فشارەك بیت ل سەر هەڤپەیمانان دا كو پارە ومەزاختیێن پاراستنا خۆ بدەن. ل ڤێرێ شەڕ ژ سەنگەرێن ئەردی دگوهۆڕیت بۆ ژمارێن بۆرسەیان، كو ئەڤە ب دیتنا ترامپی كاریگەرترە و ب كێمترین زیانێن مرۆڤی بۆ ئەمریكا بدوماهیك دئێت.
لێ راستییا دۆرهێلی ئەوە، كو دەستنیشانكرنێن د ئیدارەیا نوی یا ترامپی دا هاتینە كرن، تێكەلەیەكن ژ كارێكتەرێن شەڕخواز كو باوەری ب لێدانێن پێشوەخت هەیە، بەرامبەر خەلكەكێ دی یێ بێ دەستهەلات كو دخوازن هەبوونا ئەمریكا كێم بكەن. ئەڤ دژایەتییە یە گومانان پەیدا دكەت، وهندەك پسیاران دئازرینیت.
ئەرێ ب دووماهی ئینانا هەڤركیان رامانا ئاشتیەكا گشتگیرە، یان ژی پاقژكرنا رۆلێن هەرێمی یە، دا كو رێك خۆش بیت بۆ لێدانەكا ئێكلاكەر بۆ پرۆژێ ئێرانی ل رۆژهەلاتا ناڤین؟ ژ لایەكێ دی ڤە، ئەرێ دەستبەردان ژ ئۆكرانیا دانپێدانە ب شكەستنێ، یان ژی خۆ قورتالكرنە ژ قەیرانەكێ كو كۆگەهێن ستراتیژی یێن ئەمریكا سست كرینە؟
پسیارا سەرەكی ئەڤەیە: ئەرێ ئەڤا هاتیە راگەهاندن خاپاندنە یان ستراتیژییەتەكا دەركەفتنێ یە؟.
رەنگە راستی د ناڤبەرا هەردویان دا بیت. ترامپ پێدڤی ب وێنەیێ ئاشتیخوازەكی یە، دا كو پێگەهێ خۆ یێ جەماوەرێ یێ ناڤخۆیی پێ بهێز بێخیت، بەلێ د هەمان دەمدا پێدڤی ب هەیبەتەكا سەربازی ژی هەیە، دا كو مەرجێن خۆ ل سەر جیهانێ بسەپینیت. ئەو سەركردەیێ هەردەم ئاشتیێ رادگەهینیت، رەنگە هەمان ئەو كەس بیت یێ كو خەنجەر ل پشت خۆ ڤەشارتی دا كو پشتراست بیت ئەڤ ئاشتییە ب مەرجێن وی ب تنێ نە.
ل دووماهیێ، چاڤەڕێی سوپرایزان بن..
ئەگەر ئەم بێژین كو شەڕ ب دووماهی هات گەلەك تشتەكێ گەشبینە، و ئەگەر ئەم بێژین كو تنێ فێلەكە رەنگە نە یا هویربین بیت. ئەم ل بەرانبەر قووناغەكا پێناسەكرنا نوی یا هەڤركیێنە. ترامپ ب راستی خۆ ئامادە دكەت، بەلێ نە مەرجە بۆ شەڕەكێ گشتگیر، بەلكو بۆ كریارێن تایبەت كو نەخشەیێ هێزان سەرو ژ نوی بكێشنیت بێی كو بكەڤیتە د ناڤ شەرەنیخا شەڕێن ناڤخۆیی یان كێشەیێن سنووری یێن درێژخایەن. ئەڤە نە درەوە ب وێ رامانا كلاسیكی، بەلكو فێلەكا ستراتیژی یە مەرەم پێ لاوازكرنا وڕەیا نەیاری یە بەری كو ب ئالاڤێن نوی بەرهەنگاری ببیت. زێدەباری كو تانوكە بۆچوونا لایەنێ ئیرانی یا رۆهن نینە، د دەمەكی دا، كو قەیرانا باوەریی یە ژ لایێ ترامپی ڤە، كو سپێدێ بریارەكێ ددەت و ئێڤاری بریارەكا هەڤدژ.
