باشترە ژن شەڤێ ل مالبابا خۆ نەمینیت
بێوار حەمدی:
زانایەکێ ئایینێ ئیسلامێ دیار کر کو نابیت ژن بێی رازیبون و زانینا زەلامێ خۆ ژ مال دەرکەڤیت، هەتا ئەگەر مالبابا وێ ژی بیت، بسپورەکا زانستێن جڤاکی ژی گۆت؛ ئەگەر ژن حەفتیێ جارەکێ بچیتە مالبابا خو و شەڤێ نەمینت باشترە.
مەلا حسێن کواشی زانایێ ئایینێ ئیسلامێ، د دیدارەکێ دا بۆ ڕۆژنامەیا ئەڤرۆ دیار کر کو د شەریعەتێ ئیسلامێ دا چونا ژنێ بو مالبابا وێ یا ڕێ پێدایە و حەرامە لسەر زەلامی ببیتە رێگر و نەهێلیت بچیت و گۆت؛ چونا ژنێ بو مالبابێ لدویڤ داب و نەریتێن وێ خێزانێ و مالباتێ دمینیت کا چەند بمینیت و کەنگی بچیت.
ژلایەکێ دیڤە د. سەمیا سەعید ماموستایا زانکویێ و بسپورا زانستێن جڤاکی سەبارەت هەمان بابەت دیار کر کو ل سالێن دەسپێکێ یێن هەڤژینیێ نورمالە ژن زوی ب زوی سەرەدانا مالبابا خۆ بکەت و گۆت؛ ژبەرکو پەیوەندیێن وێ ل گەل مالبابا وێ خورتترن، لێ هەتا کو پەیوەندیێن وێ دگەل مالا زەلامی ژی ب گەهنە هەمان ئاست و ب دروستی دگەل وان بگونجیت، پێدڤی ب ماوەیەکێ درێژ هەیە.
مەلای گۆتژی؛ بدیتنا من ئەگەر مالا ژنێ نێزیکی مالبابا وێ بیت باشترە ئەو شەڤێ نەمینیت، لێ ئەگەر یا دوور بیت و ڕێیا چەندین دەمژمێرا بیت ل وی دەمی بابەت جیاوازترە.
مەلا حسێن ئەو چەندە ژی دا زانین، بێی رازیبوون و زانینا زەلامێ خۆ نابیت، ژن ژ مال دەرکەڤیت، هەتا ئەگەر مالبابا وێ ژی بیت و گۆت؛ ژبەرکو گەلەک جاران ئاریشە پەیدا دبن و ل وی دەمی ژن بەرپرسیارە چونکی دەستوری وەرنەگرتیە.
بسپورا زانستێن جڤاکی د بەردەوامیا ئاخفتنێن خودا دیار کر کو هندی ژن بشێت شەڤێ ل مالبابا خو نەمینیت باشترە، ژبەرکو دێ پتر هەست ب بەرپرساتیا مالا خو یا نوی کەت و زەلامێ خو ژی ناهێلیتە بتنێ.
دکتورە سەمیایێ دیار کر ژی کو پێدڤییە هەر ژ دەسپێکا هەڤژینیێ مالا کچێ وێ وەسا تێبگەهینن کو ئێدی ئەڤە مالا وێ نینە، دڤێت پتر چاڤێ وێ ل مالا هەڤژینێ وێ بیت و گۆت؛ بدیتنا من ئەگەر ژن حەفتیێ جارەکێ بچیت و شەڤێ بزڤریتە مال باشترە.
