بڕیارا کوردان یا ل دۆر شەڕێ ئیرانێ د جهێ خوە دایە
چاڤدێرەکێ سیاسی دیار کر، بریارا کوردان ل دۆر شەڕێ ئیرانێ د جهێ خوە دایە چونکی ئەو یەک شەڕێ کوردان نینە و هەروەسا ئەمریکا و ئسرائیل کار بۆ پارچەکرنا ئیرانێ ناکەن و ژ بەر ڤێ یەکێ ژی گەلەک باش بوو کورد نەبوونە پشکەک ژ شەڕێ ئیرانێ.
جەنگ ساغنچ چاڤدێرێ سیاسی ل ئەمریکا دیار کر، د ئەنجاما شەرێ پتر ژ مەهەکێ ئەمریکا و ئسرائیلێ شیاینە رژێما نها یا ئیرانێ لاواز بکەن، لێ ئیران ژی ب هەموو رەنگەکێ شەڕی دکەت و دخوازیت شەڕی ل هەموو رۆژهەلاتا ناڤین بەلاڤ بکەت، گرۆپێن کو ب سالانە ئیران پشتەڤانیێ ل وان دکەت نها ژ بۆ پاراستنا رژێما ئیرانێ یا ژ دەستێ وان دهێت دکەن، مخابن هەکە رەوش وەسا بەردەوام بیت دێ شەڕ گەهیتە گەلەک وەلاتێن دی ژی و وی دەمی دێ زیانێن گەلەک مەزن گەهنە وەلاتێن رۆژهەلاتا ناڤین و گۆت: (ئەمریکا دەستپێکێ دخواست کوردێن رۆژهەلاتێ کوردستانێ ژی پشکداریێ د شەڕی دا بکەن، لێ تورکیا، سعوودیێ و گەلەک وەلاتێن دی یێن رۆژهەلاتا ناڤین ل دژی ڤێ یەکێ بوون، د ئەنجام دا ئەمریکا ژی ژ بریارا خوە ڤەبوو، لێ گرنگە ئەم بزانین کو بریارا کوردان بخوە ژی گەلەک باش بوو، چونکی نها رەوش گەلەک ئالۆزە و دیارە نینە کا دێ ئەنجاما شەڕی چ بیت، ژ بەر ڤێ یەکێ ژی ئەز دبێژم هێزێن کوردی یێن رۆژهەلاتێ کوردستانێ بریارەکا گرنگ دان).
ناڤهاتی ئەو یەک ژی دیار کر، ئەمریکا و ئسرائیل کار بۆ پارچەکرنا ئیرانێ ناکەن، وان دڤێت دەستهەلاتا نها لاواز بیت یان ژی دەستهەلات خوە رادەست بکەت، دبیت گوهۆڕین ل ئیرانێ دروست ببن، لێ د هەمان دەمی دا دبیت ئەمریکا شەڕی بدەتە راگرتن ژی، ئانکو رەنگە رژێما نها بمینیت ژی، ب گشتی رەوش گەلەک ئالۆزە چونکی وەکو من بەری نها ژی دیار کری رژێما ئیرانێ یێ شەڕی بۆ مانا خوە دکەت و هەموو کارتێن د دەستێ خوە دا بکار دئینیت و گۆت: (د دەمەکێ وەسا دا ئیران دشێت ئاریشەیێن گەلەک مەزن بۆ وەلاتێن رۆژهەلاتا ناڤین و جیهانێ ژی دروست بکەت، نها قەیرانا وزێ ل جیهانێ دروست بوویە و هەکە بۆ دەمەکێ دی شەڕ بەردەوام بیت دێ قەیرانا خوارنێ ژی دروست بیت، ژ بەر ڤێ یەکێ ژی نها ئەمریکا دڤێت د زووترین دەمی دا بگەهیتە ئارمانجا خوە و دووماهیێ ب شەڕی بینیت).
چاڤدێرێ سیاسی ل ئەمریکا د دووماهیا ئاخڤتنا خوە دا ئەو یەک ژی دیار کر، مخابن رۆژانە گرۆپێن چەکدار ئێرشی هەرێما کوردستانێ دکەن، دڤێت هەرێما کوردستانێ داخوازا سیستەمێ بەرگریێ یێ موشەکی بکەت، رەوشا نها نیشا ددەت هەکە کورد سیاسەتەکا راست برێڤە ببەن د پاشەرۆژێ دا کورد دشێن ببنە هێزەکا کاریگەر.
